Qazaqstan azamattyǵyn alǵan Eýropa chempıony ulttyq quramaǵa shaqyrtý aldy

ASTANA. QazAqparat – Qostanaı fýtbol mektebiniń túlegi Aleksandr Zýev Qazaqstan azamattyǵyn alyp, ulttyq quramaǵa shaqyrtý aldy, dep habarlaıdy QazAqparat tilshisi.

Qazaqstan fýtbol federatsııasynyń baspasóz qyzmetinen málim etkenindeı, A.Zýev ulttyq quramanyń aldaǵy oqý-jattyǵý jıynyna jaraqatyna baılanysty qatyspaıtyn Aslan Darabaevtyń ornyna barady.

Aleksandr Zýev 1996 jyly 26 maýsymda Qostanaıda dúnıege kelgen, «Tobyl» fýtbol mektebiniń túlegi. Óz mansabynda reseılik «Spartak» (Máskeý), «Rostov», «Rýbın», «Hımkı» syndy klýbtarda oınaǵan. Jartylaı qorǵaýshy Reseı chempıonatynyń aıaqtalǵan maýsymyn «Krylıa Sovetov» klýby sapynda ótkizdi.

Fýtbolshy Reseıdiń jastar jáne jasóspirimder quramalaryna turaqty túrde shaqyryldy. 2013 jyly 17 jasqa deıingiler arasynda Reseı quramasy sapynda Eýropa chempıony boldy. Sondaı-aq 2017 jyly máskeýlik «Spartak» quramynda Reseı chempıony atandy.

Eske sala keteıik, budan buryn Karım Benzemanyń saýdııalyq «Ál-Ittıhad» klýbynyń oıynshysy atanǵanyn jazǵan edik.