Qazaqstan azamattyǵy joqtyqty boldyrmaý jónindegi BUU-nyń jahandyq naýqanyna qatysady
ASTANA. QazAqparat - Qazaqstan azamattyǵy joqtyqty boldyrmaý jónindegi BUU-nyń jahandyq naýqanyna qatysatyn bolady. Búgin Senatta «Azamattyq jáne azamattyǵy joq tulǵalar» atty anyqtamalyqtyń tusaýkeseri barysynda BUU-nyń Ortalyq Azııadaǵy Bosqyndar jónindegi Joǵarǵy Komıssary basqarmasynyń ókili Bernard Doıl málim etti.
Basqarma ókiliniń aıtýynsha, byltyrǵy jyly búkil álemdegi azamattyǵy joqtyqty joıý maqsatynda aldaǵy on jylǵa arnalǵan jahandyq naýqan iske qosyldy. Naýqanǵa BUU Bosqyndar isi jónindegi Joǵarǵy komıssary Antonıo Gýtıerres bastama jasaǵan kórinedi.
«Osyǵan baılanysty, búgingi Senattaǵy kezdesý osynaý jahandyq bastamanyń mańyzdy kezeńine aınalmaq. Al anyqtamalyqqa kelsek, bul parlamentaralyq odaqpen jáne BUU Bosqyndar isi jónindegi joǵary komıssarmen birlese otyryp, azamattyǵy joqtyq problemalarymen aınalysatyn depýtattar de úshin jasaldy. Osyǵan oraı Qazaqstan da azamattyǵy joqtyqty boldyrmaý jónindegi BUU-nyń jahandyq naýqanyna qatysatyn bolady», - deıdi B.Doıl.
Sonymen qatar, BUU ókili Ortalyq Azııa memleketteri sekildi Qazaqstan da osy baǵytta belsendi jumys atqaryp jatqanyn jetkizdi. Onyń aıtýynsha, Túrkimenstan qazirdiń ózinde 1961 jylǵy Azamattyǵy joqtyqty azaıtý týraly konventsııaǵa, 1954 jylǵy Apatrıdter mártebesi týraly konventsııaǵa qosylǵan. Qyrǵyzstan «Azamattyq týraly» zańnamasyn halyqaralyq normalarǵa sáıkestendirdi. Qazaqstanda BUU Bosqyndar isi jónindegi Joǵary komıssar Syrtqy ister mınıstrligimen birlese otyryp, elimizdegi azamattyǵy joqtyq problemalaryna qarsy kúsh biriktirýge ýaǵdalasqan.
Aıta keteıik, anyqtamalyq halyqaralyq quqyqtyń qorǵaýynda bolǵan azamattyǵy joq tulǵalardyń quqyqtary men mindetteri týraly aqparattandyrýǵa arnalǵan.
