Qazaqstan azamattyǵyn alǵan jandar armany men basynan ótken oqıǵasyn aıtyp berdi
ShYMKENT. KAZINFORM - Donııar, Abdýl Kerim jáne Svetlananyń Qazaqstan azamattyǵyn alý jolyndaǵy kedergilerdi jeńýi jańa ómirge umtylystyń jarqyn beınesin kórsetedi. Mahabbattyń, tabandylyqtyń jáne shyǵarmashylyqtyń arqasynda olar Qazaqstanda óz oryndaryn tapty. Qazaq elin óz úıim dep bilgen sheteldikterdiń shabyttandyratyn oqıǵalaryn sizdermen bólisip otyrmyz.
Azamattyqqa aparar jol: Donııar men Gúlnar taǵdyry
Donııar Mırzahmetov 1967 jyly Shymkentte dúnıege kelgen. Bala kezinen mýzykanyń qudiretin túısinip ósti. Segizinshi synyptan keıin Gúlistan memlekettik mektebine oqýǵa túsip, keıin Tashkent memlekettik konservatorııasyn úzdik bitirdi.
1996 jyly Ózbekstan tólqujatyn alyp, shymkenttik Gúlnármen birge otaý qurdy. Degenmen áıeli Ózbekstan azamattyǵyn ala almaı, keńestik úlgidegi qujatpen kúneltti. Ol kezde erli-zaıyptylardyń eki balasy bolatyn. Bıýrokratııalyq kedergilerden sharshaǵan otbasy Qazaqstanǵa qonys aýdarýdy uıǵardy.
Otanyn oralǵan Gúlnár Qazaqstan azamattyǵyn aldy. Shymkentte kelgen jas otbasy kóp uzamaı taǵy eki balaly boldyi. Olar da avtomatty túrde Qazaqstan azamaty atandy.
«Áıelim Ózbekstanda turǵanda uzaq ýaqyt boıy bir sheshimge kele almaıtynbyz. Sebebi, ol jaqta azamattyq alý óte qıyn edi. 20 jyl boıy kúttik, sodan úmitti úzip Qazaqstanǵa oralýdy uıǵardyq. Sebebi, onyń Qazaqstan azamaty bolýǵa tolyq sebebi bar – ol osynda dúnıege kelgen. Biz munda úlken jetistikke jettik! Qazir úıimiz, otbasymyz, dostarymyz bar», - deıdi otaǵasy.
Qazir Donııar Shymkenttegi mýzyka mektebiniń halyq aspaptary bóliminde muǵalimi bolyp eńbek etedi. Mektep oqýshylaryna gıdjak oınaýdy úıretip júr. Ol Ózbekstanda týǵan eki balasymen birge Qazaqstan azamattyǵyn alýdy armandaıdy. Olar qazaq tili men el tarıhyn biletinderine senimdi. Búginde aldaǵy emtıhandarǵa tyńǵylyqty daıyndalyp jatyr.
«Qazaqstan maǵan óte jaqyn. Munda meniń ata-anam, balalarym, nemerelerim turady. Halqy meıirimdi jáne janashyr, men osynda turǵanyma qýanyshtymyn», – deıdi Donııar Mırzahmetov.
Tashkentte turǵanyna 30 jyl ótse de, dostary men týystaryna qazir tek qonaq retinde barady. Al, óziniń úıi Shymkentte ekenin jáne qazaqstandyq tólqujatty alýdy - otbasy tarıhynyń mańyzdy kezeńi ári jańa taraýy bolady dep biledi.
Nıgerııadan Qazaqstanǵa kóshý: Abdýl Kerım Adeshın Abdýl Fathıdiń oqıǵasy
KerimGold degen atpen tanymal Abdýl Kerım Adeshın Abdýl Fathı dostarynyń shaqyrýymen 2014 jyly Qazaqstanǵa kóship keldi. Sondaı-aq, qazaq tilindegi ánderdi jan-jaqty oryndaýynyń arqasynda áleýmettik jelilerde birden tanymal boldy.
Negizi Nıgerııadan kelgen KerimGold Qazaqstanǵa kóshkenge deıin Birikken Arab Ámirlikterinde, Grýzııada jáne Ázerbaıjanda turyp, til bilimi men mýzykalyq qabiletterin damytqan. Alaıda, onyń aıtýynsha, ol esh jerde ózin Qazaqstandaǵydaı jaıly sezinbegen.
Abdýl Kerım segiz tilde sóıleı alady. Qazaq, ıorýba, ıgbo, aǵylshyn, túrik, ázirbaıjan, orys jáne arab tilderin erkin meńgergen. Sondaı-aq, ol kitap oqýdy, ásirese qazaq ádebıetin unatady, Abaı Qunanbaevtyń fılosofııasyn óz mýzykasyna sheber úılestirgenin maqtan etedi.
Qazaqstandaǵy on jyl ishinde KerimGold Astanada, Shymkentte jáne Aqtaýda turdy. Qazir Almatyǵa oturaqtap, shyǵarmashylyǵyn jalǵastyrýda. Osy jyly ol óziniń «Bizde bar» atty debıýttik albomyn shyǵardy. Bul Qazaqstanda turatyn sheteldiktiń alǵashqy albomy boldy. Ol negizinen qazaq tilinde 13 trekti qamtıdy.
«Ár ánim danalyqqa toly. Qazaqstanda túrli etnos ókilderi beıbitshilik pen kelisimde ómir súrip jatyr. Meniń oıymsha, bul - ómirge jaılylyq, osynda qalýǵa degen umtylys jáne shyǵarmashylyq múmkindik týdyratyn meıirimdi orta», - deıdi mýzykant.
Abdýl Kerımniń Qazaqstan azamattyǵyn alýdan úmitti. Elimizde eki uly dúnıege kelgennen keıin, Qazaqstanda ómir boıy qalýdy maqsat etip otyr. Búginde mýzykant ári kompozıtor 10 jyl ishinde jańa ómirge ońaı beıimdelgenin aıtady. Týǵan jerdi saǵynǵanda, jaqyndarymen beıneqońyraý arqyly habarlasyp turady.
«Jaqynda meniń úlken ápkem Qazaqstannyń erekshe tartymdylyǵyn túsiný úshin Londonnan Almatyǵa ushyp keldi» - deıdi ol.
Nıgerııanyń týmasy jaqyn arada ózin «Qazaqstan Respýblıkasynyń azamatymyn» dep maqtanyshpen aıtatynyna úmitti.
Svetlana Kım: mahabbat pen azamattyqtyń jeke tarıhy
Svetlana Kımniń hıkaıasy – tabysty ıntegratsııa men jańa otanǵa degen súıispenshiliktiń úlgisi. Ózbekstannyń týmasy, ulty káris. Jýrnalıstıka mamandyǵy boıynsha dıplom alyp, 2004 jyly Shymkentke qonys aýdarǵan. Svetlana tez arada mamandyǵy boıynsha jumysqa ornalasyp, kóp uzamaı Qazaqstan azamaty Aleksandrmen tanysqan. Birneshe aıdan keıin ǵashyqtar úılendi. Ol kezde Svetlananyń Qazaqstanda tek turýǵa ǵana ruqsaty bolǵan.
Jasy 25-ke tolǵanda, burynǵy tólqujatynyń merzimi ótip ketkendikten, azamattyqty ózgertý týraly suraq týyndaıdy. Kóshi-qon qyzmeti oǵan Qazaqstan azamattyǵyn alýdy usynǵan. Svetlana óz tańdaýyna senimdi boldy. Sodan birden kelisim berip, Qazaqstan azamaty atandy. Sebebi, ol otbasyn qurǵan elde qalǵysy keldi jáne sol kezde birinshi balasyn dúnıege ákeldi.
«Biz Qazaqstanda súıispenshilikke toly otbasyn qurdyq. Qazir kúıeýim ekeýmizdiń tórt balamyz bar. Sońǵy 19 jylymdy jaqyn adamdarymnyń ortasynda ótkizgenime qýanyshtymyn. Shymkenttiń klımaty men týǵan jerdegideı - jyly ári jaıly», – deıdi Shymkent qalasynyń turǵyny.
Búginde ol tabysty telejúrgizýshi jáne týrıstik agenttik ıesi. Ońtústik Koreıada uzaq jyldar turyp jatqan aǵasymen beıneqońyraý arqyly habarlasyp turady. Svetlana Tashkenttegi ata-anasyna jıi barady. Olar da Shymkentke nemerelerin kórýge qýana keledi.
Svetlana balalarymen birge qazaq tili men Qazaqstan tarıhyn zertteýdi jalǵastyryp jatyr. Ol kóship-qonyp, azamattyq alǵanyna eshqashan ókingen emes jáne bul kezeń ol úshin ońaı bolǵanyna ári tańdanyp, ári qýanady.
Aıta keteıik, QR Ǵylym jáne joǵary bilim mınıstri Saıasat Nurbek mınıstrlik Qazaqstan azamattyǵyn alǵysy keletin sheteldikterge arnalǵan testilerdi daıarlaýǵa kirisetinin aıtty.
