Qazaqstan azamattyǵyna úmitker qazaq tili men tarıhynan test tapsyrady

ASTANA. KAZINFORM — Ǵylym jáne joǵary bilim mınıstriniń buıryǵymen Qazaqstan Respýblıkasynyń azamattyǵyna qabyldaý nemese azamattyǵyn qalpyna keltirý kezinde memlekettik tildi qarapaıym deńgeıde, Konstıtýtsııa negizderin, sondaı-aq Qazaqstan tarıhyn bilý kólemin aıqyndaý boıynsha testileýdi ótkizý qaǵıdalary bekitildi.

Qazaqstan Respýblıkasynyń azamattyǵyna úmitker (budan ári – testilenýshi) bilý kólemin aıqyndaý maqsatynda testileýden ótedi. Qaǵıdalar kámeletke tolmaǵandarǵa, áreketke qabiletsiz adamdarǵa, Qazaqstan Respýblıkasyna sińirgen aıryqsha eńbegi bar ne Qazaqstan Respýblıkasynyń Prezıdenti belgileıtin tizbe boıynsha kásipterge ıe jáne talaptarǵa saı keletin adamdarǵa, etnıkalyq qazaqtarǵa, sondaı-aq Qazaqstan Respýblıkasy ratıfıkatsııalaǵan halyqaralyq sharttar negizinde jeńildetilgen tártippen Qazaqstan Respýblıkasynyń azamattyǵyn alýǵa quqyǵy bar adamdarǵa qoldanylmaıdy.

Testileý kelesi bloktardan turady:

1) tildik bilimdi baǵalaý júıesiniń qarapaıym deńgeıi boıynsha qazaq tilin bilýin aıqyndaýǵa arnalǵan test (qazaq tilinde);

2) Qazaqstan Respýblıkasy Konstıtýtsııasynyń negizderi boıynsha test (qazaq nemese orys tilinde);

3) Qazaqstan tarıhy boıynsha test (qazaq nemese orys tilinde).

Test tapsyrmalarynyń jalpy sany – 100 (júz), onyń ishinde:

1) qazaq tili boıynsha – 30 (otyz), onyń ishinde: tyńdalym bóligi boıynsha – 15 (on bes), oqylym bóligi boıynsha – 15 (on bes);

2) Qazaqstan Respýblıkasy Konstıtýtsııasynyń negizderi boıynsha – 40 (qyryq);

3) Qazaqstan tarıhy boıynsha – 30 (otyz).

Testileýde usynylǵan tórt jaýaptyń ishinen bir durys jaýap tańdalatyn test tapsyrmalary qoldanylady. Durys jaýap bir balmen baǵalanady. Testileýge beriletin jalpy ýaqyt 2 (eki) saǵat 10 (on) mınýtty quraıdy. Barlyq toptaǵy múgedektigi bar adamdarǵa qosymsha 30 (otyz) mınýt beriledi.

Shekti ball keminde 50 (elý) baldy quraıdy, onyń ishinde bloktar boıynsha:

1) qazaq tili boıynsha – keminde 15 (on bes) ball;

2) Qazaqstan Respýblıkasy Konstıtýtsııasynyń negizderi boıynsha – keminde 20 (jıyrma) ball;

3) Qazaqstan tarıhy boıynsha – keminde 15 (on bes) ball.

Testileý kúntizbelik jyldyń aqpan jáne tamyz aılarynda jylyna 2 ret ótkiziledi. Testileýdi ótkizý merzimderi men pýnktin ǵylym jáne joǵary bilim salasyndaǵy ýákiletti organ aıqyndaıdy.

11. Testilenýshi testileýge kirgizý kezinde kelesi qujattardyń túpnusqalarynyń birin usynady:

1) azamattyǵy joq adamnyń kýáligi nemese sheteldik pasport;

2) sheteldiktiń Qazaqstan Respýblıkasynda turýyna yqtııarhaty.

Testileý qorytyndysy boıynsha osy qaǵıdalardyń 9-tarmaǵynda aıqyndalǵan shekti baldy eńsergen shetel azamattary men azamattyǵy joq adamdarǵa osy qaǵıdalardyń 1-qosymshasyna sáıkes nysan boıynsha qazaq tilinde elektrondyq sertıfıkat beriledi. Shekti baldy eńsermegen kezde elektrondyq sertıfıkat berilmeıdi. Elektrondyq sertıfıkat testileý aıaqtalǵannan keıin testilenýshiniń jeke kabınetinde qoljetimdi (apellıatsııaǵa ótinish bergen testilenýshilerdi esepke almaǵanda) bolady.

Elektrondyq sertıfıkat UTO-nyń saıtyna testilenýshiniń jeke sáıkestendirý nómirin (budan ári – JSN) jáne jeke kodyn engizý arqyly rastalady. Elektrondyq sertıfıkattyń jaramdylyq merzimi berilgen kúninen bastap 2 (eki) jyldy quraıdy.

Buıryq 2026 jyldyń 27 qańtarynan kúshine enedi.

Osyǵan deıin azamattyq alýǵa arnalǵan test qashan ótetini týraly jazǵan edik.