Qazaqstan azamattyǵyn alýshylar sany 25 paıyz azaıdy – QR ІІM

ASTANA. KAZINFORM – Sońǵy jyldary Qazaqstan azamattyǵyn alý týraly ótinishter sany azaıdy. Bul týraly Іshki ister mınıstrligi Kazinform agenttiginiń resmı saýalyna joldaǵan jaýapta aıtylǵan.

— Ótken jyly Qazaqstan azamattyǵyn 20,2 myń adam aldy. Onyń ishinde 15,6 myńy nemese 77% qandas. Bul 2023 jylmen salystyrǵanda 25%-ǵa az. 2023 jyly 26 828 adam Qazaqstan azamattyǵyn alǵan edi. Onyń 20,5 myńy – qandas bolǵan, - delingen habarlamada.

Vedomstvo málimetinshe, Qazaqstan Respýblıkasynyń azamattyǵyna qabyldanǵan adamdardyń eń kóp sany: Ózbekstan, QHR, Reseı, Túrikmenstan jáne Qyrǵyzstanǵa tıesili. 

Zańnamaǵa saı, Qazaqstan Respýblıkasy azamattyǵyn alýdyń eki tártibi kózdelgen: «Qazaqstan Respýblıkasy azamatyǵy týraly» zańnyń 16-1-babyna sáıkes jeńildetilgen tirkeý tártibi (qaraý merzimi 3 aı) jáne osy zańnyń 16-babyna sáıkes jalpy belgilengen tártip (qaraý merzimi 6 aı). 

Aıta keteıik, buǵan deıin byltyr qansha adam el azamattyǵynan bas tartqany jaıly jazǵan edik.