Qazaqstan azamattyǵyn alýǵa úmitkerlerdiń ótinishi qashan qabyldanady

ASTANA. KAZINFORM — Qazaqstan Respýblıkasynyń azamattyǵyn alýǵa úmitkerler úshin testileýge ótinishterdi qabyldaý 17-29 sáýir aralyǵynda ótedi. Bul týraly Ulttyq testileý ortalyǵy habarlady.

— Tirkelý Ulttyq testileý ortalyǵynyń app.testcenter.kz saıtynda nemese UTO qosymshasy arqyly júrgiziledi. Testileýdiń ózi 30 sáýirde ótedi, — delingen habarlamada.

 Testileý 3 bólimnen turady:

tildik bilimdi baǵalaý júıesiniń qarapaıym deńgeıi boıynsha qazaq tilin bilýin anyqtaýǵa arnalǵan test (qazaq tilinde) — 60 tapsyrma, shekti ball — 36;
Qazaqstan Respýblıkasy Konstıtýtsııasynyń negizderi boıynsha test (qazaq nemese orys tilinde) — 15 tapsyrma, shekti ball — 9;
Qazaqstan tarıhy boıynsha test (qazaq nemese orys tilinde) — 25 tapsyrma, shekti ball — 15.

Eń joǵary ball — 100, shekti ball — 60.

Testileý ýaqyty — 2 saǵat 10 mınýt. 

Múmkindigi shekteýli (múgedektigi bar) tulǵalarǵa testileý tapsyrý úshin qosymsha 30 mınýt beriledi.

Tolyq aqparat testcenter.kz saıtynda «Azamattyq alýǵa úmitkerlerge» bóliminde qoljetimdi. 

— Daıyndyǵyn jaqsartýdy qalaıtyn úmitkerler úshin tegin (testcenter.kz saıtynda «Azamattyq alýǵa úmitkerlerge» bóliminde) jáne aqyly (app.testcenter.kz saıtynda «Baıqaý synaǵy» bóliminde — 3355 tg.) baıqaý synaǵy usynylǵan, — delingen habarlamada.

Aıta ketelik Qazaqstan shetel azamattaryna JSN berýdi qaıta bastaıtyny týraly jazǵan edik.