Qazaqstan azamattyǵyn alýǵa úmitkerler úshin mańyzdy aqparat

ASTANA. KAZINFORM – Qazaqstan Respýblıkasynyń azamattyǵyn alýǵa úmitkerler úshin testileýge ótinishterdi qabyldaý 3-13 naýryz aralyǵynda ótedi. Bul týraly Ulttyq testileý ortalyǵy habarlady. 

Tirkelý Ulttyq testileý ortalyǵynyń app.testcenter.kz saıtynda nemese UTO qosymshasy arqyly júrgiziledi.

Testileýdiń ózi 15 naýryzda ótedi.

- Testileý 3 bólimnen turady: tildik bilimdi baǵalaý júıesiniń qarapaıym deńgeıi boıynsha qazaq tilin bilýin anyqtaýǵa arnalǵan test (qazaq tilinde) – 60 tapsyrma, shekti ball – 36; Qazaqstan Respýblıkasy Konstıtýtsııasynyń negizderi boıynsha test (qazaq nemese orys tilinde) – 15 tapsyrma, shekti ball – 9; Qazaqstan tarıhy boıynsha test (qazaq nemese orys tilinde) – 25 tapsyrma, shekti ball – 15. Eń joǵary ball – 100, shekti ball – 60. Testileý ýaqyty – 2 saǵat 10 mınýt. Múmkindigi shekteýli (múgedektigi bar) tulǵalarǵa testileý tapsyrý úshin qosymsha 30 mınýt beriledi, - delingen Ulttyq testileý ortalyǵy habarlamasynda.    

Tolyq aqparat testcenter.kz saıtynda «Azamattyq alýǵa úmitkerlerge» bóliminde qoljetimdi. Sondaı-aq, saıtta tegin baıqaý synaǵy usynylǵan.

Eske salsaq JSN alý men azamattyq alýdyń aıyrmashylyǵy týraly jazǵan edik.