Qazaqstan azamattyǵyn alýǵa arnalǵan testileýge ótinish qabyldaý 10 tamyzda bastalady
ASTANA. KAZINFORM – Qazaqstan Respýblıkasynyń azamattyǵyn alýǵa úmitkerler úshin testileýge ótinish qabyldaý 10-20 tamyz aralyǵynda júrgiziledi, dep habarlaıdy Ulttyq testileý ortalyǵy.
Ótinishti Ulttyq testileý ortalyǵynyń app.testcenter.kz saıty nemese UTO mobıldi qosymshasy arqyly berýge bolady. Testileý 22 tamyzda ótedi.
– Testileý úsh bólimnen turady: qazaq tili boıynsha 30 tapsyrma, Qazaqstan Respýblıkasy Konstıtýtsııasynyń negizderi boıynsha 40 tapsyrma jáne Qazaqstan tarıhy boıynsha 30 tapsyrma beriledi, – delingen ortalyq habarlamasynda.
Qazaq tili boıynsha test qazaq tilinde ótkiziledi jáne shekti ball – 15. Konstıtýtsııa negizderi boıynsha test qazaq nemese orys tilinde tapsyrylady, shekti ball – 20. Qazaqstan tarıhynan da qazaq nemese orys tilinde test tapsyrýǵa bolady, bul bólimdegi shekti ball – 15.
Jalpy testileýde eń joǵary nátıje – 100 ball. Azamattyq alýǵa úmitker keminde 50 ball jınaýy tıis.
Testileýge 2 saǵat 10 mınýt beriledi. Múgedektigi bar adamdarǵa qosymsha 30 mınýt qarastyrylǵan.
– Testileýge qatysý quny – 14 693 teńge. Daıyndyǵyn jaqsartqysy keletin úmitkerler úshin 3 355 teńgege aqyly baıqaý synaǵy usynylady, – dep habarlady Ulttyq testileý ortalyǵy.
Tolyq aqparat Ulttyq testileý ortalyǵynyń testcenter.kz saıtyndaǵy «Azamattyq alýǵa úmitkerlerge» bóliminde qoljetimdi.
Aıta keteıik, Shyǵys Qazaqstanda 6 adam qos azamattyqpen júrgeni habarlandy.
