Qazaqstan azamattyǵyn alý úshin test tapsyrýǵa ótinish qabyldaý bastaldy
ASTANA. KAZINFORM — Abaı oblysynyń Polıtsııa departamentiniń kóshi-qon qyzmeti Qazaqstan Respýblıkasynyń azamattyǵyn alý úshin test tapsyrýǵa ótinish qabyldanatynyn habarlaıdy.
— Bıylǵy jyldyń 3–10 aqpany aralyǵynda Qazaqstan Respýblıkasynyń azamattyǵyn alý úshin qazaq tilin jáne Qazaqstan tarıhyn bilýge arnalǵan testileýge qatysýǵa ótinishter qabyldanady. Testileý aǵymdaǵy jyldyń 11 aqpanynda ótedi. Oǵan qatysý úshin ótinishti talapker Ulttyq testileý ortalyǵynyń aqparattyq júıesi arqyly onlaın rejımde bere alady, — delingen habarlamada.
Testileýshi app.testcenter.kz saıtyna kirip, ótinish bere alady. Al testileý nátıjelerin tekserý úshin certificate.testcenter.kz saıtyna kirý qajet.
Test tapsyrmalarynyń jalpy sany — 100, onyń ishinde:
- Qazaq tili — 30 tapsyrma,
- QR Konstıtýtsııasynyń negizderi — 40 tapsyrma,
- Qazaqstan tarıhy — 30 tapsyrma.
Shekti ball 100 balldan keminde 50 ball bolýy tıis, onyń ishinde:
- Qazaq tili — keminde 15 ball,
- QR Konstıtýtsııasynyń negizderi — keminde 20 ball,
- Qazaqstan tarıhy — keminde 15 ball
Testileýge 2 saǵat 10 mınýt beriledi. Qatysý quny — 14 693 teńge. Testileý qorytyndysy boıynsha shetel azamattary men azamattyǵy joq adamdarǵa shekti balldan asqan jaǵdaıda qazaq tilinde elektrondyq sertıfıkat beriledi. Shekti balldan aspaǵan jaǵdaıda elektrondyq sertıfıkat berilmeıdi.
Aıta keteıik, elektrondyq sertıfıkattyń jaramdylyq merzimi berilgen kúnnen bastap 2 (eki) jyldy quraıdy.
Budan buryn Almatyda kóshi-qon tártibin buzǵan 21 shetel azamaty elden shyǵarylǵanyn jazǵan edik.