Qazaqstan azamattarynyń Grýzııaǵa kire almaýyna baılanysty QR SІM osy eldiń Elshisine nota tapsyrdy
«Bıylǵy sáýirdiń ortasynda QR Syrtqy ister mınıstrligi Konsýldyq qyzmet departamentiniń dırektory Nurlan Qasymqulovtyń Qazaqstandaǵy Grýzııa Elshisi Zýrab Pataradzemen kezdesýi ótti. Onda osy eldiń dıplomatymen Qazaqstan azamattaryn Grýzııa aýmaǵyna kirgizýden bas tartý oqıǵalarynyń jıilep ketýine baılanysty másele talqylandy. Atap aıtqanda, kezdesý barysynda QR azamattaryn Grýzııaǵa kirgizýden bas tartý sebepterin anyqtaýǵa kómek kórsetý ótinishimen Grýzııa Syrtqy ister vedomstvosyna Qazaqstan SІM atynan resmı nota tapsyryldy», - dedi QR SІM baspasóz hatshysy Nurjan Aıtmahanov QazAqparat tilshisiniń saýalyna jaýap berý kezinde.
Belgili bolǵandaı, Grýzııa Elshisine sonymen qatar atalǵan másele boıynsha keıbir Qazaqstan azamattary ótinishteriniń kóshirmesi de usynylǵan.
Baspasóz hatshysynyń sózine qaraǵanda, Nurlan Qasymqulovpen kezdesý barysynda Zýrab Pataradze TMD elderinen kelgen reısterde osyndaı oqıǵalar oryn alǵanyn jáne bul aqparatty óziniń basshylyǵyna jetkizetindigin atap ótti. Sonymen birge, Grýzııa Elshisi deportatsııa oqıǵalarynyń jaqynda óziniń elinde trafıkpen jáne adam saýdasymen kúres boıynsha ótkizilgen sharalarmen janama baılanysy bolýy yqtımal ekenin túsindirip baqty.
Sóz sońynda Zýrab Pataradze eki el arasyndaǵy dostyq qarym-qatynastardy eskere otyryp, sondaı-aq 2014 jyldyń Grýzııadaǵy qazaqstandyq týrızmniń jyly dep atalýyna baılanysty grýzındik tarap Qazaqstan týrısteriniń saparlaryna barynsha qoldaý bildirýge daıyn ekenin atap ótken.