Qazaqstan azamattarynyń 99,5 paıyzy saýatty - Bilim jáne ǵylym vıtse-mınıstri
ASTANA. 27 qarasha. QazAqparat /Qanat Mámetqazyuly/ -Qazaqstan azamattarynyń 99,5 paıyzy saýatty. Búgin elordada EQYU aıasyndaǵy Sholý konferentsııasy barysynda QR Bilim jáne ǵylym vıtse-mınıstri Mahmetqalı Sarybekov osylaı dedi.
«Elimizde bilim berýge aýqymdy ári teńdeı qoljetimdilik qamtamasyz etilýiniń arqasynda, Qazaqstan halqynyń 99,5 paıyzy saýatty bolyp tabylady. 5-ten 24 jasqa deıingi jurtshylyqtyń 85 paıyzy bilim alýmen qamtylǵan. Budan bólek, azamattardyń 30 paıyzy bilim jáne ǵylym júıesine tartylyp otyr. Máselen, 4,4 mln. adam oqyp, bilim alyp jatsa, 405 myń adam osy salada qyzmet etedi», dedi M. Sarybekov.
Vıtse-mınıstrdiń aıtýyna qaraǵanda, Qazaqstandaǵy bilim berý saıasatynyń basty qaǵıdattarynyń biri ulttyq-mádenı teńdikti qalyptastyrý, mádenıetaralyq toleranttylyqty, etnıkalyq, mádenı, dinı tózimdilikti saqtaý bolyp tabylady. Osyndaı qaǵıdattyń saqtalýy nátıjesinde azamattardyń memlekettik jáne ana tilinde bilim alý quqyǵyna kepil beriledi. «Elimizde 79,1 myń bala - ózbek, 14,7 myń bala - uıǵyr, 3,6 myń bala - tájik tilinde oqytylýda. 19 ulttyń balalary (14,5 myńnan astam adam) 104 jalpy bilim berý mektepterinde ana tilderin ózindik pán retinde oqıdy. 81 jeksenbilik mektepte 4 myń 257 oqýshy qosymsha ana tilin oqyp, óz halqynyń dástúri men mádenıetimen tanysa alady. Respýblıkadaǵy 33 mektepte úsh tilde - qazaq, aǵylshyn, orys tilderinde oqytylady», dedi M. Sarybekov. Sonymen birge, vıtse-mınıstr Qazaqstan Ortalyq Azııa elderi arasynda birinshi bolyp Bolon úderisiniń tolyqqandy músheligine qabyndanǵanyn aıtyp, bilim berý salasynda EQYU qaǵıdattary belsendi túrde ómirge enip otyrǵanyn jetkizdi.
