Qazaqstan azamattarynyń 61 paıyzy resmı medıtsınaǵa senedi – zertteý
Atalǵan zertteýdi 15 elde STADA farmatsevtıkalyq kompanııasy júrgizgen. Bul zertteý jyl saıyn Eýropanyń elderinde ótkiziletin. Al bıyl osy saýalnamaǵa Qazaqstan da engizildi.
Bıyl zertteý aıasynda 30 myńnan astam adam saýalnama kezinde qamtylyp, sonyń arasynda eki myńnan astam Qazaqstan azamaty boldy.
Osy oraıda STADA Health Report 2022 zertteýiniń keıbir derekterin kópshilik nazaryna usynýdy jón sanadyq.
«Pandemııa bolǵan eki jyl ishinde dárigerlerdiń eleýli eńbegin barshamyz baıqadyq. Saýalnamaǵa qatysqan Qazaqstan azamattarynyń 61 paıyzy resmı medıtsınaǵa, ıaǵnı emhanalar men statsıonarlarda kórsetiletin qyzmetterge senedi. Sonymen qatar, resmı medıtsınaǵa senetin Qazaqstan turǵyndarynyń 35 paıyzy ǵalamtordaǵy aqparatty qaıta tekseretinin aıtqan. Respondentterdiń taǵy 17 paıyzy emdeýdiń balama ádisterin bilgisi keletinderin alǵa tartyp otyr», - delingen zertteý málimetinde.
Munymen qosa saýalnamaǵa qatysqan qazaqstandyqtardyń 47 paıyzy densaýlyq máselesinde ǵalymdarǵa senetinin málimdedi. Respondentterdiń 41 paıyzy terapevterdiń biliktiligine senimmen qaraıtynyn aıtqan.
Budan bólek, saýalnama kezinde qamtylǵan eýropalyqtar arasynda ǵalymdarǵa senim bildirgenderdiń deńgeıi 61 paıyz bolǵan. Bul elderde jalpy tájirıbedegi dárigerlerge degen senim 65 paıyz deńgeıinde tirkeldi.
