Qazaqstan azamattaryna shetelge barmaýǵa keńes berildi

NUR-SULTAN. QazAqparat – QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova Qazaqstan azamattaryna shetelge barmaýǵa keńes berdi, dep habarlaıdy QazAqparat tilshisi.

«6 qazannan beri memlekettik shekarany avtoótkelder arqyly 149 myńǵa jýyq Qazaqstan azamaty men sheteldikter kesip ótti. Onyń ishinde 278-inde indet anyqtaldy. Elge indet juqtyryp kelý jaǵdaılarynyń kóbisi Soltústik Qazaqstan, Batys Qazaqstan, Pavlodar jáne Qostanaı oblystarynda tirkelgen. Sońǵy aptada avtoótkelderden ótý kezinde 122 jaǵdaı anyqtaldy, bul jalpy kórsetkishtiń 45 paıyzyn qurap otyr», - dedi komıtet basshysy Ortalyq kommýnıkatsııalar qyzmetinde.

Onyń sózine qaraǵanda, 6 qazannan beri halyqaralyq reıstermen 61 myńǵa jýyq jolaýshy keldi. Onyń ishinde 8 352 adam testileýden ótip, sonyń arasynda COVID-19 boıynsha oń nátıje bergen 41 jaǵdaı tirkeldi.

«Atap aıtqanda, 17-si Mysyrdan, Túrkııa-13, Belarýs – 16, Reseı – 1, BAÁ-den 4 jaǵdaı tirkeldi. Sondyqtan shetelge saparlaýdy josparlasańyzdar, ol elde koronavırýs ınfektsııasyn juqtyrý qaýpi bar ekenin eskerińizder. Qazirgi kezde múmkindiginshe shetelge shyqpaýǵa tyrysý kerek», - dedi A. Esmaǵambetova.