Qazaqstan azamattaryna Ońtústik Sýdanǵa sapar jasaýdan bas tartý týraly eskertildi
ASTANA. 8 qańtar. QazAqparat - QR Indýstrııa jáne jańa tehnologııalar mınıstrliginiń Týrızm ındýstrııasy komıteti Ońtústik Sýdandaǵy daǵdarys jaǵdaıy tolyǵymen rettelgenshe qazaqstandyq azamattarǵa bul elge týrıstik sapar jasaýdan bas tartý týraly eskertý jasady.
«Ońtústik Sýdandaǵy áskerı tóńkeris áreketinen týyndaǵan tártipsizdikke baılanysty myńdaǵan adam kóz jumdy. Qaza tapqandardyń arasynda jaǵdaıdy retteý úshin jiberilgen BUU bitimgerleri de bar. Kóptegen elderdiń bılik oryndary óz azamattaryna ol elden ketýdi usyndy. Qazir bul memlekette dıplomatııalyq ókilder men týrısterdi kóshirý jalǵasyp jatyr»,-delingen atalǵan vedomstvo baspasóz qyzmetiniń málimetinde.
Aıta keteıik, keıingi jyldary ekstremaldy safarıdi unatýshy týrıster arasynda Ońtústik Sýdan keńinen tanymal bolyp otyr.
