Qazaqstan azamattaryn Sırııadan shyǵarý sharasy áskerı operatsııaǵa aınaldy - QR SІM
ASTANA. QazAqparat - Búgin Qazaqstannyń shet memleketterdegi qurmetti konsýldarynyń sezi barysynda birqatar dıplomattar marapattaldy. Olardyń ishinde Qazaqstannyń Sırııadaǵy qurmetti konsýly Saıd Naxas myrzaǵa erekshe alǵys aıtyldy, dep xabarlaıdy QazAqparat tilshisi.
«Biz Saıd Naxas myrzaǵa erekshe alǵysymyzdy aıtaıyn dep edik. Sebebi ol kisi Sırııadaǵy qarýly qaqtyǵystar aımaǵynan Qazaqstan azamattaryn shyǵarýǵa úlken kómek kórsetti. Shyny kerek, ol jumys ońaıǵa soqpady. Qazaqstandyqtardy elge qaıtarý sharasy kádimgideı áskerı operatsııaǵa aınaldy. Óıtkeni sol kezde qarýly qaqtyǵystar qatty júrip jatqan. Qurmetti konsýlymyz qolda baryn jasap, qarýly kúzetke deıin taýyp berdi. Olar arnaıy marshrýt boıynsha Sırııanyń qaýipti aımaqtarymen júrdi. Jol-jónekeı qarýly oppozıtsııanyń birneshe toptary arqyly ótýge týra keldi. Sóıtip, Beırýt pen Lıvan arqyly Qazaqstanǵa aman-esen jetti. Sol úshin Saıd Naxas myrzaǵa shyn alǵysymyzdy aıtamyz», - deıdi QR Syrtqy ister mınıstrligi Konsýldyq qyzmet departamentiniń basshysy Ardaq Mádıev.
Aıta keteıik, búgingi shara barysynda Chexııa, Horvatııa, Italııa, Germanııa, Ýkraına, Moldova, Japonııa, Soltústik Afrıka men Pákistandaǵy Qazaqstannyń qurmetti konsýldary marapattaldy. Barlyǵyna «QR Dıplomatııalyq qyzmetine 25 jyl» mereıtoılyq medali tabystaldy. Búginde Qazaqstannyń shet elderdegi konsýldary ınvestıtsııalardy tartyp, san alýan máselelerdi sheshýmen aınalysady.
