Qazaqstan azamattary jappaı gımnastıkaǵa shyǵady
ASTANA. 5 qyrkúıek. QazAqparat - Aldaǵy senbi, qyrkúıektiń 7-si kúni respýblıka boıynsha Densaýlyq festıvali ótedi.
Bıylǵy festıvaldiń urany - «Densaýlyǵym keremet - jattyǵýǵa kóp rahmet!». Osyǵan oraı, respýblıka boıynsha jappaı gımnastıka jattyǵýlaryn uıymdastyrý josparlanǵan. Ol úshin tańerteń bir ýaqytta radıo jeli arqyly keshendi jattyǵýlar men olardy oryndaý tártibi taratylady. Osy kezde barlyq stadıondar men sport alańdarynda san alýan is-sharalar - «Anam, ákem jáne men - sportshy otbasymyz!», «Qol jetkizemiz kópke - bolsaq biz birge!», urpaqtar estafetasy, pamperspen júgirý sııaqty «kóńildi starttar», kórmeler, vıktorınalar jáne baıqaýlar ótedi. Sondaı-aq sulýlyq pen densaýlyqqa arnalǵan taýarlar, sport ádebıetteri men durys tamaqtaný ónimderiniń jármeńkeleri uıymdastyrylmaq.
