Qazaqstan azamattary vızasyz júre alatyn memleketter sany 80-ge deıin artty - Premer
Іs-sharaǵa ShYU elderiniń mınıstrleri, halyqaralyq qonaqúıler, iri qazaqstandyq jáne sheteldik týroperatorlar, áýe kompanııalar jelileriniń basshylary, sondaı-aq ınvestorlar, halyqaralyq sarapshylar, dıplomatııalyq korpýs jáne memlekettik organdardyń ókilderi qatysty.
Premer-Mınıstr óz sózinde memlekettiń týrızmdi damytýǵa, tól mádenıetimiz ben dástúrlerimizdi nasıhattaýǵa úlken mán berip otyrǵanyn atap ótti. El Prezıdenti Qasym-Jomart Toqaev óziniń jýyrda jarııalaǵan halyqqa Joldaýynda bul salada serpindi jobalardy iske asyrýdy tapsyrdy.
«Biz»zákirlik«jobalar iske asyrylatyn mańyzdy 10 týrıstik aımaqty anyqtadyq. Olardyń biri – Kaspıı teńiziniń jaǵalaýy. Bul - erekshe faýnasy, kórkem jaǵajaılary men ejelgi kórikti jerleri bar erekshe meken. Biz kez kelgen qonaq úshin barynsha qolaıly jaǵdaı jasaýǵa nıettimiz. Memlekettiń de, jeke sektordyń da kúsh-jigeri osyǵan baǵyttalǵan», — dedi Álıhan Smaıylov.
Onyń aıtýynsha, týrıstik týrlardy uıymdastyrý jáne bıologııalyq árkelkilikti saqtaý úshin ınvestorlar qorshaǵan ortaǵa zııan keltirmeıtin jańa nysandar men jobalar jasaýǵa belsendi túrde tartylyp otyr.
«Mundaı kúsh-jigerdiń jarqyn mysaly – Іle-Alataý, Sharyn jáne Altyn-Emel sııaqty oryndarda vızıt-ortalyqtary men eko-qonaqúılerdiń paıda bolýy. Ekologııalyq turaqtylyq negizderin basshylyqqa ala otyryp, biz týrısterdiń sanynan góri olardyń saıahattarynyń sapasyn arttyrýǵa kóshý jolynda jumys istep jatyrmyz», — dep atap ótti Úkimet basshysy.
Álıhan Smaıylov aıtýynsha, Qazaqstan halyqaralyq týrıstik naryqta básekege túse alatyn biregeı týrlardy usyna alady. Máselen, Uly Jibek joly men Kaspıı teńizi boıynsha keshendi saıahattar, Baıqońyr men Býrabaı, sondaı-aq Almatydaǵy «4 maýsym» týry sııaqty jerlerge barý týrısterdiń arasynda qyzyǵýshylyq týdyrady.
Premer-Mınıstr búginde Qazaqstanda azamattary vızasyz júre alatyn memleketterdiń sany 80-ge deıin artqanyn eske saldy. Sonymen qatar halyqaralyq áýe qatynasynyń geografııasy keńeıip keledi.
«Ótken jyldan beri memlekettik qoldaý sharalary boıynsha týrızm nysandaryn salý, taý shańǵysy kýrorttaryn damytý jáne týrıstik avtobýstar satyp alý jobalary qamtyldy. Sheteldik týrıster tartý úshin memleket týroperatorlarǵa da sýbsıdııa beredi. Sondaı-aq el ishinde saıahattaıtyn Qazaqstan azamattary úshin balalar áýe bıletteri sýbsıdııalanady», — dedi Álıhan Smaıylov.
Onyń aıtýynsha, sońǵy úsh jylda salaǵa $4 mlrd kóleminde ınvestıtsııa tartylyp, 400-den astam týrıstik nysan salyndy. Respýblıkada Hilton, Marriott, Wyndham, Accor jáne t.b. sııaqty 20-dan astam tanymal halyqaralyq qonaq úı jelileri esigin aıqara ashty.
«Biz sheteldik jáne otandyq ınvestorlardy Qazaqstannyń týrızm salasyn el Úkimetiniń qoldaýymen uzaq merzimdi ınvestıtsııa salý múmkindigi retinde qarastyrýǵa shaqyramyz», — dedi Álıhan Smaıylov.
Sonymen qatar Úkimet basshysy otandyq týrızmniń halyqaralyq arenadaǵy básekege qabilettiligin arttyrý aıasynda Qazaqstannyń sheteldegi ımıdjin kóterý boıynsha vedomstvoaralyq úılestirý jumystaryn kúsheıtý mańyzdy ekenin atap ótti. Osyǵan baılanysty eldiń týrıstik brendin ázirlep, halyqaralyq aqparat keńistigindegi tanymal etý jumystaryn kúsheıtý kerek.
«Vızalyq jáne kóshi-qon rejımin odan ári jetildirý jóninde sharalar qabyldaý, vıza alý rásimderi men áýejaılarda baqylaýdan ótýdi de jeńildetý qajet», — dedi Premer-Mınıstr.
Sonymen qatar ınvestıtsııalyq belsendilikti arttyrý úshin týrızm jobalaryna jeńildikpen nesıe berý merzimderin uzartýdy pysyqtaý jáne týrızm nysandaryna ınfraqurylym júrgizý boıynsha memlekettik qoldaý sharalaryn kúsheıtý talap etiledi.
«Túrli týrıstik baǵyttardy ınfraqurylymmen qamtamasyz etý úlken mańyzǵa ıe ekenin kórip otyrmyz. Bul týraly bıznes tarapy da udaıy kóterip keledi. Biz bul máselege respýblıkalyq deńgeıde de, jergilikti deńgeıde de qoldaýdy arttyrýǵa nıettimiz», — dedi Úkimet basshysy.
Sonymen qatar Álıhan Smaıylov jol boıyndaǵy servıstik nysandardy paıdalaný sapasy máselelerin sheship, agrotýrızmdi damytý sharalaryn ázirleý qajettigin aıtty.
«Aýyl turǵyndary, sharýalar men baǵbandar óz sharýashylyqtarynda týrısterdi qabyldaý arqyly qosymsha tabys taba alady. Ol úshin biz zańnamaǵa tıisti ózgerister engizýimiz kerek. Community based tourism – álemdik trend, odan qalys qalmaý kerek», — dedi Úkimet basshysy.
Premer-Mınıstr Týrızm jáne sport ındýstrııasyn qoldaý korporatıvtik qorynyń máselelerin oǵan sport salasynyń ǵana emes, týrızm salasynyń da jobalaryn qarjylandyrý quqyǵyn bere otyryp, sheshý mańyzdy ekenin atap ótti. Álıhan Smaıylov salanyń damý áleýeti zor ekenin jáne qosymsha jumyspen qamtyp, azamattardyń tabysyn arttyra alatynyn aıtty.
«Servıs pen qyzmetterdiń sapasyn arttyrý aıasynda salany tsıfrlandyrý boıynsha jumysty jalǵastyrý qajet. Týrısterdiń, ásirese olardyń taýly jerlerdegi qaýipsizdigin qamtamasyz etýge baǵyttalǵan sharalardy qabyldaý mańyzdy. Odan bólek qonaqúılerdi klassıfıkatsııalaý júıesin reformalaý jáne standarttardy halyqaralyq deńgeıge deıin kóterý boıynsha jumysty bastaý qajet», — dedi Álıhan Smaıylov.
Sóz sońynda Premer-Mınıstr forýmǵa qatysýshylardy kelesi jyly elimizdiń bas qalasynda ótetin Dúnıejúzilik kóshpendiler oıyndaryna qatysýǵa shaqyrdy.
«Bul aýqymdy is-sharada qonaqtar kóshpeli halyqtardyń erekshe mádenıetimen tanysyp, biregeı oıynǵa kýá bolatynyna senimdimin», — dedi Úkimet basshysy.
Forým qorytyndysy boıynsha týrızm salasyndaǵy qazaqstandyq jáne sheteldik kompanııalar ózara yntymaqtastyq týraly kelisimderge qol qoıdy.
