Qazaqstan azamattary Túrkııanyń úsh qalasynda daýys berip jatyr (FOTO)
ASTANA. QazAqparat - Túrkııanyń Ankara, Ystambul jáne Antalııa qalalarynda jergilikti ýaqyt boıynsha saǵat 07:00-de daýys berý úshin № 205, № 236 jáne № 246 saılaý ýchaskeleri ashyldy, dep habarlady QR-nyń Túrkııadaǵy Elshiliginen.
Saǵat 07:00-de birinshi bolyp kelgen Qazaqstan azamattarynyń qatysýymen saılaý ýchaskeleriniń ashylý rásimi uıymdastyryldy. Túrkııada óz daýysyn birinshi bolyp QR-nyń Túrkııadaǵy Tótenshe jáne Ókiletti Elshisi Janseıit Túımebaev berdi.
«Qazaqstan azamattary Túrkııa elindegi kúrdeli ishki jaǵdaıǵa qaramastan, QR Parlamenti Májilisiniń kezekten tys saılaýynda ózderiniń daýys berý konstıtýtsııalyq quqyǵyn paıdalaný úshin saılaý ýchaskelerine kelip jatyr», - delingen habarlamada.
Túrkııadaǵy qazaqstandyq saılaýshylardyń basym bóligin osy elde bilim alyp jatqan jastar qurap otyr, olardyń arasynda áskerı mamandyqtar boıynsha oqyp jatqan kýrsanttar da bar. Saılaý ýchaskelerine Túrkııanyń túrli qalalaryndaǵy JOO-nyń stýdentteri men doktoranttary da kelip jatyr. Elde mundaı 1500-nan astam ókil bar.
Daýys bergenderdiń arasynda Túrkııada áıgili tulǵa, otandasymyz Marat Ahmet te bar. Ol Túrkııa Prezıdentiniń qolynan joǵarǵy ǵylymı marapat alǵan matematık-ǵalym. Túrkııada 1998 jyldan beri ǵylymı zertteýler júrgizip keledi. M. Ahmet - matematıkalyq ǵylymdarynyń doktory, professor, iri ǵalym, Túrkııada jáne kóptegen shetel elderge tanymal tulǵa.
Sondaı-aq Túrkııada jumys istep júrgen ǵalymdar, jýrnalıster, oqytýshylar, dárigerler jáne basqa da Qazaqstan azamattary óz daýystaryn berýde.
