Qazaqstan azamattary memlekettik qyzmetterdi bir jerden alatyn bolady
ASTANA. QazAqparat - «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasy Senattyń jalpy otyrysyna joldandy. Búgin atalǵan zań jobasyn QR Parlamenti Senaty Ekonomıkalyq saıasat, ınnovatsııalyq damý jáne kásipkerlik komıteti jan-jaqty talqylap, osyndaı sheshim qabyldady.
«5 ınstıtýtsıonaldyq reformany iske asyrý jónindegi «100 naqty qadam» Ult josparynda Elbasy memlekettik qyzmettiń biryńǵaı provaıderine aınalatyn «Úkimet - azamattar úshin» memlekettik korporatsııasyn qurýǵa tapsyrma bergen. Memlekettik korporatsııa halyqqa qyzmet kórsetýdiń barlyq ortalyqtaryn bir jerge biriktiredi. Azamattar memlekettik qyzmetterdi bir jerden alatyn bolady»,- dedi zań jobasyn tanystyrǵan QR Investıtsııalar jáne damý birinshi vıtse-mınıstri Jeńis Qasymbek.
Birinshi vıtse-mınıstrdiń aıtýynsha, Zań jobasy memlekettik qyzmetterdi kórsetetin tolyq tsıkldi qaǵıdat boıynsha halyqaralyq tájirıbeni eskere otyryp ázirlendi. ıAǵnı, qabyldaý, óńdeý jáne qujat berý uıymynyń ózimen iske asyrylady.
«Halyqqa qyzmet kórsetý ortalyqtarynyń oń jumysyn eskere otyryp, onyń negizinde Jer kadastry memlekettik ǵylymı-óndiristik, Jyljymaıtyn múlik jáne Zeınetaqy tóleý jónindegi ortalyqtardy qosý arqyly memlekettik qyzmetterdiń biryńǵaı provaıderin qurý usynylyp otyr. Osy usynys QR Prezıdenti janyndaǵy Jańǵyrtý jónindegi ulttyq komıssııa tarapynan qoldaý tapty», - dedi J.Qasymbek.
Aıta keterligi, Zań jobasynyń negizgi maqsattary memlekettik qyzmetterdi kórsetý sapasyn jaqsartý jáne merzimderin qysqartý, servıstik kompanııalardyń qyzmetterin qosa alǵanda tutynýshymen tolyq tsıkldi júıede jumys jasaý, barlyq memlekettik qyzmetter boıynsha qyzmet kórsetetin biryńǵaı sapa standarttaryn engizý, memlekettik qyzmetterge qol jetimdilikti kóterý bolmaq.
Zań jobasyn komıtet músheleri talqylap, ony Senattyń jalpy otyrysynda qaraý týraly sheshim qabyldady.
