Qazaqstan azamattary qaı elderge vızasyz bara alady
«Qazirgi kezde Qazaqstan Respýblıkasynyń azamattary ulttyq tólqujatpen álemniń 29 eline vızasyz bara alady. Sonymen qatar, birqatar eldermen dıplomatııalyq jáne qyzmettik pasporttardyń ıelerin vızadan ózara bosatý týraly kelisimge qol jetkizildi», - delingen Qazaqstan Syrtqy ister mınıstrliginiń «QazAqparat» agenttigine bergen jaýabynda.
Qazaqstandyqtar Ózbekstanǵa barǵanda sol memlekettiń aýmaǵynda 5 kúnnen astam bolǵan jaǵdaıda, al Ázerbaıjan, Belarýs, Qyrǵyzstan, Tájikstanda 30 kúnnen astam bolǵan jaǵdaıda quzyretti organdarda tirkelýge mindetti.
Budan bólek, Gonkong, Iran, Omanǵa 14 kúnge deıin, Barbadosqa 28 kúnge deıin, Argentına, Brazılııa, Malaızııa, Maldıv Respýblıkasy, Birikken Arab Ámirlikteri, Serbııa, Fılıppın, Ekvadorǵa 30 kúnge deıin, Albanııa, Kolýmbııa, Kosta-Rıka, Moldova, Mońǵolııa, Reseı, Ýkraınaǵa 90 kúnge deıin, Armenııa, Sent-Vınsent jáne Grenadınge 180 kúnge deıin, sondaı-aq Grýzııaǵa 1 jyl aralyǵyna deıin vızasyz saparlaýǵa bolady.
Qazaqstan azamattary Túrkııada 90 kúnge deıin vızasyz júre alady. Koreıaǵa da 30 kúnge deıin vızasyz saparlaýǵa múmkindik bar. Biraq, 2022 jyldyń 1 sáýirinen beri azamattyń Koreıaǵa kirýin avtorızatsııalaıtyn «K-ETA» elektrondyq júıesi jumys istep tur.
Atap aıtqanda, áýejaıǵa jetkennen keıin vıza beretin elderdiń qatarynda Mysyr men Taıland bar. Taıland Qazaqstan azamattaryna vızany ushyp barǵannan keıin 30 kúnge beredi.
