Qazaqstan azamattary ishki týrızmge kóbirek nazar aýdara bastady
«Bıyl biz elimizdegi ishki týrızmniń jáne Qazaqstanǵa keletin týrısterdiń óskenin baıqap otyrmyz, sondaı-aq elimizden shet elge baratyn týrızmniń tómendegeni tirkeldi. Buǵan eń aldymen álemdik qarjylyq sektordaǵy ózgerister, sonymen qatar ózge de jahandyq úderister yqpal etti. Máselen, Eýropada qaýipsizdikke qatysty, kóshi-qon baǵytyndaǵy belgili bir máseleler bar. Osy rette týrızm Ońtústik Shyǵys Azııaǵa qaraı jyljyp keledi. Atap aıtqanda, biz osy jolda turmyz jáne Qazaqstanda bul úderisti paıdalanyp, týrısterdi tartýǵa múmkindikter barshylyq»,-dep toqtaldy ol Ortalyq kommýnıkatsııalar qyzmetinde ótken Qazaqstannyń ishki týrızmin damytýǵa arnalǵan dóńgelek ústelde.
Osy oraıda M. Iǵalıev aldaǵy jyly elordada ótetin EKSPO-2017 halyqaralyq kórmesin barynsha utymdy paıdalaný kerektigin sóz etti.
Taratylǵan málimetterge qaraǵanda, respýblıkanyń JІÓ-degi týrızmniń úlesi shamamen 0,9 paıyzdy quraıdy (tek jatyn oryn jáne tamaqtaný boıynsha qyzmet túrlerin eseptegende). 2016 jyldyń I jartyjyldyǵynda ishki týrıster qatary 2,1 mln adamdy quraǵan. Bul ótken jylǵy kórsetkishke qaraǵanda 5,8 paıyzǵa artyq. Onyń ishinde 217 myń ishki jáne 5 myń syrttan kelgen týrıst kýrorttyq aımaqtarǵa barǵan. Іshki týrısterdiń 73 paıyzǵa jýyǵy (1,5 mıllıon adam) qonaq úı, demalys úıi jáne ózge týrıstik bazalar sekildi ornalasý oryndarynyń qyzmetin paıdalanǵan.