Qazaqstan azamattary ǵaryshqa 2013 jyly ushady - Ulttyq ǵarysh agenttigi
ASTANA. 27 jeltoqsan. QazAqparat /Aıdar Ospanalıev/ - «Ǵaryshqa ushady degen Qazaqstannyń eki azamaty tolyq daıyndyqtan ótti. Olardyń ǵaryshqa ushýǵa bilimderi de tájirıbeleri de jetkilikti», -dedi búgin Ulttyq ǵarysh agenttigi tóraǵasynyń orynbasary Meıirbek Moldabekov.
Bul týraly ol búgin Parlament Senatynyń Halyqaralyq ister, qorǵanys jáne qaýipsizdik komıtetiniń keńeıtilgen otyrysynda málim etti.
Otyrys barysynda Qazaqstan men Reseı arasyndaǵy ǵarysh keńistigin beıbit maqsattarda zertteý jáne paıdalanýǵa qatysty qujat talqylanyp jatqan tusta depýtattar Agenttik tóraǵasynyń orynbasaryna ǵaryshqa ushqaly jatqan Qazaqstan azamattarynyń taǵdyry týraly saýal tastady. Oǵan jaýap retinde M.Moldabekov eki azamattyń da daıyndyqtan ótkendigin jáne qazirgi tańda ǵaryshqa ushýmen baılanysty ózge de jumystarmen aınalysyp jatqandyǵyn jetkizdi. «Ushqyshtardyń biri ózimizdiń agenttiktiń qyzmetkeri. Jalpy, bul jigitter aldaǵy ýaqytta ǵaryshqa ushady degen úmittemiz. Ázirge ol úshin basty eki máseleni sheshý qajet bolyp tur. Birinshiden, qarjylandyrý máselesi sheshilýi kerek. Ekinshiden, ǵarysh salasyndaǵy halyqaralyq stansanyń ıeleri - 18 memleket. Buryndary biz stansanyń ıesi tek Reseımen ǵana kelisetin bolsaq, endi osy 18 memlekettiń de tilin tabý qajet bolyp tur. Stansaǵa ıelik etetin ár eldiń ǵarysh stansasyna óz azamattaryn ushyrsaq degen josparlary bar. Soǵan baılanysty qazir ózindik kezek qalyptasyp otyr. Sol kezek jetken ýaqytta ǵaryshqa esh alańsyz ushýǵa bolady. Bul múmkindik menińshe, 2013 jyly bolady degen oıdamyn»,- dedi M.Moldabekov.
