Qazaqstan azamattary bolashaqta negizinen ushaqtarmen qatynaıtyn bolady - Qazaq Air
ASTANA. QazAqparat - Qazaqstanda áýejoldary arqyly qatynaıtyn xalyq sany jyl sanap artatyn bolady. Bul týraly búgin Ortalyq kommýnıkatsııalar qyzmetinde ótken baspasóz máslıxatynda «Qazaq Air» kompanııasy basqarma tóraǵasynyń qyzmetin atqarýshy Bler Pollok málim etti.
«Qazaqstanda qalaaralyq qatynaýdyń tek 43 paıyzy áýe ushýlarǵa tıesili. 57 paıyzy jerdegi kólikpen atqarylady. 43 paıyz - óte tómen kórsetkish. Damyǵan elderde onyń úlesi áldeqaıda joǵary», - deıdi B. Pollok.
Onyń aıtýynsha, bolashaqta qazaqstandyqtar jerdegi kólikten góri, áýe arqyly qatynaýdy jıi jón kóretin bolady.
«Jaqyn bes jylda Qazaqstanda áýe kólikterindegi jolaýshylardyń sany jyl saıyn 7 paıyzǵa artyp otyrady degen boljam bar. Bizdiń jospar boıynsha, bolashaqta qazaqstandyqtar jerdegi kólikke qaraǵanda, negizinen áýe kólikteri arqyly qatynaıtyn bolady», - dep atap ótti B. Pollok.
Qazaq Air kompanııasy aımaqtyq kompanııa bolyp tabylady jáne qazirgi ýaqytta tek Qazaqstannyń ishki reısterin damytýdy kózdeýde.
