Qazaqstan azamattarynyń Mysyr, Latvııa, Meksıka jáne Reseıge kirýiniń jańartylǵan sharty

ASTANA. KAZINFORM – QR Syrtqy ister mınıstrligi Qazaqstan azamattarynyń Mysyr, Latvııa, Meksıka jáne Reseıge kirýiniń jańartylǵan shartyn jarııalady.

Latvııa Respýblıkasy

Latvııa Respýblıkasy Syrtqy ister mınıstrliginiń resmı aqparatyna sáıkes, 2025 jylǵy 1 qyrkúıekten bastap Latvııaǵa kirýdiń jańa tártibi kúshine endi. Latvııada turýǵa yqtııarhaty nemese ulttyq vızasy joq Qazaqstan azamattary Latvııaǵa kelýden keminde 48 saǵat buryn eta.gov.lv portaly arqyly ótinim berýge mindetti.

Ótinimde sapardyń maqsaty, merzimi men bolý orny, baǵyty, baılanys derekteri, sondaı-aq ótinish berýshi men onyń jaqyn týystarynyń memlekettik nemese kúshtik qurylymdarda qyzmet atqarǵany týraly málimetter kórsetiledi.

Aqparat berilmegen nemese jalǵan málimet usynylǵan jaǵdaıda, 2 000 eýroǵa deıin aıyppul salynady. Dıplomattar men dıplomatııalyq ókildikterge qysqa merzimdi qyzmettik saparmen baratyn tulǵalar bul erejeden bosatylady. Málimet jiberilgennen keıin júıe rastaýdy elektrondyq poshtaǵa joldaıdy.

Mysyr Arab Respýblıkasy

Mysyr Arab Respýblıkasynyń Astanadaǵy Elshiliginiń resmı aqparatyna sáıkes, 2025 jylǵy 1 qazannan bastap Qazaqstan azamattaryna qatysty vızalyq rejımge engizilgen jańa talaptar kúshine endi.

Jańa tártipke sáıkes: 21 jasqa tolmaǵan qazaqstandyqtar ata-anasynyń bireýiniń (ákesi nemese anasy) birge júrýinsiz Mysyr aýmaǵyna kire almaıdy; 21 jasqa tolǵan azamattar Mysyrǵa týrıstik saparmen barǵanda, eger sapar tek Sharm ash-Sheıh aımaǵymen shektelip, 15 kúnnen aspaıtyn bolsa, vızany Sharm ash-Sheıh halyqaralyq áýejaıynda rásimdeı alady; Kaır, Hýrgada nemese Mysyrdyń basqa qalalaryna barýdy josparlaǵan azamattar sapar aldynda Qazaqstandaǵy Mysyr Elshiliginen vıza alýy tıis.

Meksıka

Meksıka Úkimetiniń resmı portalynda jarııalanǵan Ulttyq kóshi-qon ınstıtýtynyń aqparatyna sáıkes, eger Qazaqstan azamattarynda AQSh, Kanada, Ulybrıtanııa, Japonııa nemese Shengen aımaǵyna múshe elderdiń jaramdy kóp mártelik vızasy bolsa, olar Meksıkaǵa meksıkalyq vızasyz kire alady.

Bul jaǵdaıda týrızm, tranzıt nemese tabys ákelmeıtin iskerlik saparlar maqsatynda elge 180 kúnge deıin kirýge ruqsat beriledi. Vıza sapardyń barlyq merziminde jaramdy bolýy tıis.

Eger mundaı vızalar bolmasa, azamattar meksıkalyq vızany aldyn ala konsýldyqtan alýy qajet.

Reseı Federatsııasy

1996 jylǵy 15 tamyzdaǵy № 114-FZ «Reseı Federatsııasynan shyǵý jáne Reseı Federatsııasyna kirý tártibi týraly» jáne 2008 jylǵy 3 jeltoqsandaǵy № 242-FZ «Reseı Federatsııasynda memlekettik genomdyq tirkeý týraly» Federaldyq zańdaryna sáıkes, sheteldik azamattar men azamattyǵy joq adamdar úshin Reseı Federatsııasyna kirý jáne shyǵý erejeleri men sharttaryn synaqtan ótkizý jónindegi Eksperıment engizilip jatyr.

Eksperıment eki kezeńnen turady:

Birinshi kezeń: 2024 jylǵy jeltoqsannan bastap 2026 jylǵy 30 maýsymǵa deıin Máskeý áýejaılarynda (Sheremetevo, Domodedovo, Vnýkovo, Jýkovskıı), sondaı-aq Orynbor oblysyndaǵy «Mashtakovo» avtomobıl ótkizý pýnktinde ótkiziledi. Bul kezeńde sheteldik azamattardyń bıometrııalyq derekteri jınalady.

Ekinshi kezeń: 2025 jylǵy 30 maýsymnan bastap 2026 jylǵy 30 maýsymǵa deıin Reseı Federatsııasynyń barlyq ótkizý pýnkterinde qoldanylady. Vızasyz rejımmen kiretin sheteldik azamattar saparǵa shyǵýdan keminde 72 saǵat buryn (shuǵyl jaǵdaılarda – 4 saǵat buryn) «ruID» qosymshasy arqyly kirý jáne bolý maqsatyn kórsetýi tıis.

Qazirgi ýaqytta «ruID» qosymshasy arqyly aqparat joldaý erikti sıpatta. QR azamattary ótinish bermeı-aq Reseıge kire alady.

Eksperıment kelesi tulǵalarǵa qoldanylmaıdy: RF-tegi sheteldik dıplomatııalyq ókildikter men konsýldyqtardyń basshylary jáne olardyń otbasy músheleri; RF-tegi sheteldik dıplomatııalyq jáne konsýldyq mekemelerdiń qyzmetkerleri jáne olardyń otbasy músheleri; RF Úkimetimen kelisim jasasqan halyqaralyq uıymdardyń ókilderi jáne olardyń otbasy músheleri; Dıplomatııalyq jáne qyzmettik pasport ıeleri (eger olarda dıplomatııalyq nemese qyzmettik vıza bolsa), resmı delegatsııa quramyndaǵy saparlar kezinde; 6 jasqa tolmaǵan shetel azamattary jáne azamattyǵy joq adamdar.

Aıta keteıik, Qazaqstan áýejaılarynda shekaralyq baqylaýdan ótý tártibi bekitildi.