Qazaqstan azamattarynyń 95%-dan astamy etnosaralyq qatynastardy turaqty dep sanaıdy — mınıstrlik

ASTANA. KAZINFORM — 2025 jyly qoǵam tarapynan etnosaralyq saıasatqa degen senim deńgeıi joǵary ekenin kórsetetin derek tirkeldi. Azamattardyń 95 paıyzdan astamy eldegi etnosaralyq ahýaldy turaqty ári qolaıly dep baǵalap otyr. Bul týraly Mádenıet jáne aqparat mınıstrliginiń baspasóz qyzmeti habarlady. 

Mádenıet jáne aqparat mınıstrligi qoǵamdyq kelisim, azamattyq birlik jáne etnosaralyq qatynastardy damytý baǵytyndaǵy jumystardy júıeli túrde jalǵastyryp keledi.

Búginde elimizde júzden astam etnostyń ókilderi beıbitshilik pen kelisim jaǵdaıynda ómir súrýde. Olardy teń múmkindikterge negizdelgen jáne turaqty damýǵa baǵyttalǵan Ádiletti Qazaqstandy qurý jónindegi ortaq maqsat biriktiredi.

Etnosaralyq kelisimdi nyǵaıtýǵa baǵyttalǵan memlekettik saıasatty iske asyrýdyń tıimdi ınstıtýtsıonaldyq júıesi qalyptasty. Bul júıe ortalyq memlekettik organdardan bastap óńirlik Qazaqstan halqy assambleıalaryna deıin barlyq deńgeıde jumys isteıdi.

Etnosaralyq qatynastardyń damý deńgeıin zerdeleý jáne praktıkalyq usynymdar ázirleý maqsatynda óńirlerde turaqty túrde áleýmettik zertteýler men monıtorıngtik saparlar júrgizilip otyr.

— 2025 jyly qoǵam tarapynan etnosaralyq saıasatqa degen senim deńgeıi joǵary ekenin kórsetetin derek tirkeldi. Azamattardyń 95 paıyzdan astamy eldegi etnosaralyq ahýaldy turaqty ári qolaıly dep baǵalap otyr.

2022 jylǵy sáýirden bastap kásibı etnomedıatorlardy daıarlaý jáne medıatsııa ınstıtýtyn damytý maqsatynda Etnomedıatsııa ortalyǵy jumys isteıdi.
Etnosaralyq salada túsindirý jumystaryn kúsheıtý úshin respýblıkalyq aqparattyq-túsindirý toby quryldy. Qazirgi ýaqytta elimizde 80 aqparattyq-túsindirý toby belsendi qyzmet atqaryp otyr.

Qazaqstan halqy Assambleıasynyń bastamasymen 1000-nan astam etnomádenı birlestik pen 4000-ǵa jýyq qoǵamdyq qurylym biriktirilgen. Olardyń qyzmetine 50 myńnan astam azamat tartylǵan. Qoǵamdyq ómirge halyqty keńinen jumyldyrýda «Aqsaqaldar keńesi» men «Analar keńesi» mańyzdy ról atqaryp keledi. Otbasylyq qundylyqtardy nyǵaıtý jáne jastardy rýhanı-adamgershilik turǵydan tárbıeleýge baǵyttalǵan «Mádenıetti ana — mádenıetti ult», «Adal azamat» jáne «Salaýatty sana» jobalary tabysty júzege asyrylyp jatyr, — delingen mınıstrlik habarlamasynda.

2025 jyly alǵash ret Almaty, Jambyl, Túrkistan jáne Jetisý oblystarynda aýdandyq deńgeıdegi assambleıalar quryldy.

«Assambleıa jastary» jastar qanaty 10 myńnan astam jas ókilin biriktirip, mádenıetter arasyndaǵy dıalogty damytýǵa baǵyttalǵan bastamalardy iske asyrýda. Jastar uıymynyń «Jańa tolqyn», «Shkola lıderov ANK» jáne «50 jas kóshbasshy» sııaqty jobalary tabysty júzege asyp keledi. Sonymen qatar, elimizdiń joǵary oqý oryndarynda túrli etnos ókilderimen jumys júrgizetin Stýdenttik assambleıa jumys isteıdi.

Ol etnosaralyq kelisim men azamattyq biregeılikti nyǵaıtýǵa, sondaı-aq volonterlik qozǵalys pen etnomedıatsııa baǵytyn damytýǵa óz úlesin qosyp otyr.

Aıta ketelik Qarın etnosaralyq kelisimdi nyǵaıtý máselelerine arnalǵan respýblıkalyq jıyn ótkizgen edi.