Qazaqstan azamattaryna qandaı qarýlardy ıelenýge ruqsat etiledi

ASTANA. KAZINFORM – Polıtsııa qarýdy tirkeý, saqtaý jáne tasymaldaý erejelerin túsindirdi.

Derekke qaraǵanda, Qazaqstan azamattaryna ańshylyq, sporttyq jáne ózin-ózi qorǵaý maqsatynda qarý ıelenýge ruqsat etiledi.

- Qarýdy satyp alý úshin www.elicense.kz portaly arqyly polıtsııadan arnaıy ruqsat alý qajet. Satyp alynǵan qarý bir apta ishinde turǵylyqty jerdegi polıtsııada tirkelýi tıis. Ár 5 jyl saıyn ruqsatty jańartý qajet, - dep túsindirdi ІІM baspasóz qyzmetinen.

Saqtaý talaptary:

• Qarý qalyńdyǵy keminde 3 mm bolatyn metall seıfte nemese berik temir jáshikte saqtalýy tıis;
• Qarý oq-dáriden bólek saqtalady;
• Qaýipsizdik talaptary saqtalyp, qalalyq eldi mekenderde dabyl júıesi ornatylýy kerek;
• Kámeletke tolmaǵandardyń qarýǵa qoly jetpeýi tıis.

- Qarýdy tıisti ruqsatpen ǵana tasymaldaýǵa bolady. Qoǵamdyq oryndarda qarý oqtalmaǵan, qaptaýly kúıde bolýy tıis.

Erejelerdi buzý qarýdy tárkileýge, ákimshilik nemese qylmystyq jaýapkershilikke ákeletinin bilgenińiz abzal, - delingen jazbada.

Aıta keteıik, Almaty oblysynda zańsyz qarý men iri kólemde esirtki tárkilendi.