Qazaqstan azamattary referendýmǵa belsendi qatysady dep senemiz – Máýlen Áshimbaev
ASTANA. KAZINFORM – Senat tóraǵasy Máýlen Áshimbaev aldaǵy respýblıkalyq referendýmǵa qatysty pikir bildirdi.
- Ózderińizge belgili, Memleket basshysynyń Jarlyǵymen 2026 jylǵy 15 naýryzda Qazaqstan Respýblıkasynyń jańa Konstıtýtsııasy respýblıkalyq referendýmǵa shyǵarylady. Bul – el damýynyń jańa kezeńindegi tarıhı oqıǵa. Konstıtýtsııanyń jobasy ashyq ári jan-jaqty talqylanyp, muqııat pysyqtaldy. Talqylaý barysynda azamattardyń usynystary barynsha eskerildi. Bul «Halyq únine qulaq asatyn memleket» tujyrymdamasynyń is júzindegi jarqyn kórinisi ekeni sózsiz, - dedi M. Áshimbaev Senattyń jalpy otyrysynda.
Bul turǵyda ol osy arqyly Ádiletti Qazaqstannyń konstıtýtsııalyq modeli qalyptasyp jatqanyn aıtty.
- Osy rette Konstıtýtsııalyq komıssııanyń jáne onyń quramyndaǵy Parlament depýtattarynyń qajyrly jumysyn erekshe atap ótken jón. Osylaısha, atqarylǵan aýqymdy jumystyń nátıjesinde ázirlengen jańa Ata Zańnyń jobasy búgin buqaralyq aqparat quraldarynda resmı túrde jarııalanady. Aldaǵy ýaqytta Senat depýttary jańa Ata Zańymyzdyń erejelerin túsindirý jumystaryna bir kisideı atsalysady dep senemiz. Osy oraıda Ádiletti Qazaqstannyń berik negizin qalaıtyn kezeńde barsha qazaqstandyq ózderiniń patrıotızmin jáne azamattyq ustanymdaryn bildirip, referendýmǵa belsendi qatysady dep senemiz jáne soǵan shaqyramyz, - dedi Senat tóraǵasy.
Budan buryn habarlanǵandaı, Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.