Qazaqstan azamattary qaı elderge jumysqa turýǵa jıi barady
ASTANA. KAZINFORM — Qazir shetelge jumysqa shyqqan Qazaqstan azamattarynyń sany 120 myńnan asty. Bul týraly QR Eńbek jáne halyqty áleýmettik qorǵaý birinshi vıtse-mınıstri Asqarbek Ertaev málim etti.
- Syrtqy ister mınıstrliginiń málimetinshe, shetelde 126 myń adam jumys istep júr. Onyń 102 myńy Reseı Federatsııasynda, 15 myńy Ońtústik Koreıada, 2 myńǵa jýyǵy Ulybrıtanııa men Eýropa odaǵy elderinde, - dedi A. Ertaev Senatta tilshiler suraǵyna jaýap bere otyryp.
Vıtse-mınıstrdiń aıtýynsha, Qazaqstan basqa eldermen resmı jumyspen qamtý salasyndaǵy yntymaqtastyqty keńeıtýdi josparlap otyr. Osy oraıda Eýropa elderimen jáne Ońtústik Koreıamen kelisimderge qol qoıý jospary bar.
- Degenmen, kóp elmen mundaı kelisimder jasalmaǵan. Máselen, Eýropa odaǵy elderimen tıisti qujatty bekitýdi josparlap otyrmyz. Kóshi-qon saıasaty tujyrymdamasy aıasynda qazaqstandyqtar jumysqa ornalasý úshin jıi baratyn elderdi qamtýǵa baǵyttalǵan sharalar naqty kórsetilgen, - dedi ol.
Budan buryn habarlanǵandaı, búgin Senattyń jalpy otyrysynda «Damýshy elderdi erekshe eskere otyryp, eń tómen jalaqyny belgileý týraly konventsııany (131-konventsııa) ratıfıkatsııalaý týraly» Zańy maquldandy.