Qazaqstan azamattary qatysqan Reseıdegi jappaı janjal: SІM jaǵdaıdy baqylaýǵa aldy
ASTANA. KAZINFORM – Áleýmettik jelilerde Reseıdegi qurylys nysandarynyń birinde bolǵan jappaı tóbelestiń vıdeosy qyzý talqyǵa tústi. Bulardyń arasynda Qazaqstan azamattary bolýy múmkin degen aqparatqa baılanysty QR Syrtqy ister mınıstrligi shuǵyl tekserý jumystaryn bastap, Reseıdiń quzyrly organdaryna resmı saýal joldady.
Threads jelisinde taraǵan kadrlardan túnde ondaǵan adamnyń ózara qaqtyǵysyp jatqanyn kórýge bolady. Vıdeoda arnaıy belgisi bar avtokóliktiń birneshe adamdy basyp ótpek bolǵan sáti de túsip qalǵan. Jeli qoldanýshylarynyń aıtýynsha, bul jaǵdaı reseılik «Velesstroı» qurylys kompanııasyna tıesili nysanda bolǵan.
Qazirgi ýaqytta Qazaqstannyń Sankt-Peterbýrgtegi Bas konsýldyǵy oqıǵanyń egjeı-tegjeıin anyqtap jatyr. Resmı málimet boıynsha, janjal 26 naýryzda Lenıngrad oblysynyń Ýst-Lýga kentinde bolǵan.
– Aldyn ala málimet boıynsha, bul oqıǵaǵa qatysqandardy Reseıdiń quqyq qorǵaý organdary mán-jaıdy anyqtaý úshin ustaǵan. Biz Reseıdiń quzyrly organdary men kompanııa basshylyǵyna resmı saýal joldadyq. Dıplomattarymyz Qazaqstan azamattarynyń naqty sanyn jáne olardyń quqyqtyq mártebesin bilý úshin Sankt-Peterbýrg jáne Lenıngrad oblystyq ІІM bas basqarmasymen turaqty baılanysta otyr. Bul másele mınıstrliktiń erekshe baqylaýynda, – dep habarlady SІM ókilderi.
Syrtqy ister mınıstrligi oqıǵanyń egjeı-tegjeıin anyqtaý boıynsha jáne otandastarymyzdyń quqyǵyn qorǵaý jumystaryn qolǵa alǵan.
Aıta keteıik, buǵan deıin QR Syrtqy ister mınıstrligi AQSh-ta iri kólemde esirtkimen ustalǵan eki Qazaqstan azamatyna qatysty túsinik bergen edi.
