Qazaqstan azamattary Armenııaǵa jeke kýálikpen ǵana saparlaı alady
ASTANA. KAZINFORM — Búgin Senattyń jalpy otyrysynda «Qazaqstan Úkimeti men Armenııa Úkimeti arasyndaǵy azamattardyń saparlary men bolý tártibi týraly kelisimdi ratıfıkatsııalaý týraly» Zańy maquldandy.
Kelisimge Memleket basshysynyń Armenııaǵa resmı sapary barysynda 2024 jylǵy sáýir aıynda qol qoıyldy.
— Kelisim eki el arasyndaǵy dostyq qarym-qatynastardy odan ári damytý maqsatynda memleketterdiń aýmaqtaryna tepe-teń negizde kelý jáne bolý tártibin ońaılatý, sondaı-aq bir memleket azamattarynyń ekinshi memlekettiń aýmaǵynda bolý merzimin belgileý, jaramdy jol júrý qujattaryn aıqyndaý maqsatynda ázirlengen, — dedi senator Qaırat Tastekeev.
Ratıfıkatsııalaýǵa usynylyp otyrǵan kelisim aıasynda eki el azamattary úshin birdeı negizde tıisti merzim bekitildi.
— Birinshiden, eki el azamattary úshin birdeı negizde 90 táýlikke deıingi merzimge ekinshi tarap memleketiniń aýmaǵyna kelýge, odan ketýge, tranzıtpen ótýge, júrip-turýǵa jáne bolýǵa quqyǵy bar. Biraq olardyń esepke turmaı bolý merzimi alty aı (180 kún) ishinde 90 táýlikten aspaýy tıis.
— Ekinshiden, bir tarap memleketiniń azamattary kelý memleketiniń quzyretti organdarynda kúntizbelik 30 kún ishinde tirkelýden bosatylady. Osy merzim aıaqtalǵannan keıin olar osy memlekettiń quzyretti organdarynda tirkelýge mindetti.
— Úshinshiden, Kelisimmen shetelge jol júrýge arnalǵan jaramdy jol júrý qujattar tizbesi aıqyndalǵan. Ondaı qujattar retinde Qazaqstan azamattary úshin jeke kýálik, al Armenııa azamattary úshin sáıkestendirý kartasy jáne basqa da qujattar belgilenedi.
— Kelisimdi ratıfıkatsııalaý ózara ýaǵdalasýshy memleketterde quqyqtyq yntymaqtastyqtyń tıimdiligin arttyrýǵa jáne saıası, ekonomıkalyq yntymaqtastyqty odan ári damytýǵa, ekijaqty qatynastardy nyǵaıtýǵa yqpal etedi. Kelisimdi Armenııa Respýblıkasy 2024 jylǵy 15 qarashada ratıfıkatsııalady, — dedi depýtat.
Budan buryn habarlanǵandaı, Senat Qazaqstan men Armenııanyń qos azamattyqpen kúres jónindegi qujatty maquldady.
Osyǵan deıin Qazaqstan men Armenııa arasynda vıza rejımi joıylatyny málim boldy.