Qazaqstan azamattary 2028 jyldan bastap Ońtústik Koreıada resmı jumys isteı alady
ASTANA. KAZINFORM — Qazaqstan Ońtústik Koreıanyń Employment Permit System (EPS) — sheteldik jumys kúshin tartýǵa arnalǵan ruqsat berý júıesine qatysýshy elderdiń qataryna resmı túrde engizildi.
Koreıa tarapynyń sheshimine sáıkes, Qazaqstan E-9 júıesine qatysýshy 18-memleket boldy.
Qazirgi ýaqytta Qazaqstannan qosa, Fılıppın, Mońǵolııa, Shrı-Lanka, Vetnam, Taıland, Indonezııa, Pákistan, Kambodja, Qytaı, Bangladesh, Shyǵys Tımor, Nepal, Mıanma jáne Laos qatysady. Ortalyq Azııadan Qazaqstanmen qatar Ózbekstan, Qyrǵyzstan jáne Tájikstan da osy júıege múshe.
— Qazaqstan azamattaryn Koreıa Respýblıkasyna jumysqa tartý 2028 jyldan bastalady dep josparlanyp otyr. Oǵan deıin úkimetaralyq ózara túsinistik týraly memorandýmǵa qol qoıý, sondaı-aq Qazaqstanda koreı tilinen testileý ótkizetin EPS-TOPIK ortalyǵyn ashý sııaqty birqatar uıymdastyrý sharasyn aıaqtaý qajet, — dep habarlady QR Eńbek jáne halyqty áleýmettik qorǵaý mınıstrligi.
Vedomstvo Qazaqstandy EPS júıesine qosý jónindegi jumysty 2023 jyldan beri júrgizip kele jatqanyn málimdedi. Osy ýaqyt ishinde azamattardy irikteý men daıarlaýǵa múmkindik beretin barlyq qajetti rásim kezeń-kezeńimen oryndaldy.
— 2026 jyldyń qańtarynda Qazaqstanǵa kelgen koreıalyq sarapshylar delegatsııasy júıeni iske qosýǵa daıyndyq deńgeıin baǵalady. Sarapshylar EPS ortalyǵyn qurý, koreı tili boıynsha testileýdi uıymdastyrý, kásibı daǵdylardy baǵalaý, medıtsınalyq tekserýden ótkizý jáne azamattardy Ońtústik Koreıa zańnamasynyń talaptary jóninde aqparattandyrý máselelerine erekshe nazar aýdardy. Júrgizilgen jumystardyń qorytyndysy boıynsha koreı tarapy Qazaqstannyń júıege qatysýǵa tolyq daıyn ekenin rastady, — delingen habarlamada.
Atap aıtqanda, qyzmetkerlerdi ádil ári ashyq irikteýdi qamtamasyz ete alatyn memlekettik jáne qoǵamdyq ınstıtýttardyń, sondaı-aq tildik daıarlyqty uıymdastyrýǵa, EPS ortalyǵynyń jumysyna jáne medıtsınalyq tekserýler ótkizýge qajetti ınfraqurylymnyń bar ekeni atap ótildi. Sonymen qatar Qazaqstan azamattarynyń atalǵan elde zańsyz bolýyna jol bermeý baǵytyndaǵy yntymaqtastyqqa tolyq daıyn ekeni rastaldy.
EPS júıesine qatysý Qazaqstan azamattaryna memleketter belgilegen rásimder sheńberinde Ońtústik Koreıada resmı túrde jumysqa ornalasýǵa múmkindik beredi.
— Jańa tetiktiń basty ereksheligi — jumysshylardy irikteý deldaldar arqyly emes, tek resmı júıe arqyly júzege asyrylady. Úmitkerler júıede kózdelgen barlyq kezeńnen, onyń ishinde koreı tili boıynsha testileýden, kásibı daǵdylaryn baǵalaýdan jáne medıtsınalyq tekserýden ótedi, — dep habarlady mınıstrlik.
Eńbek mınıstrligi azamattarǵa atalǵan rásim resmı túrde iske qosylǵanǵa deıin «Koreıaǵa jumysqa ornalastyrýdy» nemese irikteýden jedel ótkizýdi usynatyn deldaldarǵa aqsha bermeý qajet ekenin eskertti.
Tirkelý merzimderi, úmitkerlerge qoıylatyn talaptar, testileýden ótý tártibi jáne ózge de kezeńder týraly barlyq aqparat mınıstrliktiń resmı aqparattyq resýrstarynda jarııalanady.
Aıta keteıik, Employment Permit System (EPS) — Koreıa Respýblıkasynyń sheteldik jumys kúshin rettelgen tártippen tartýǵa arnalǵan memlekettik júıesi. Osy júıe aıasynda shetel azamattary Koreıa Respýblıkasynyń zańnamasynda jáne memleketaralyq rásimderde belgilengen talaptarǵa sáıkes jumysqa ornalasa alady.
Qazaqstandy E-9 júıesine qatysýshy elderdiń tizimine engizý týraly sheshimdi Koreıa Respýblıkasynyń Úkimeti 2026 jylǵy 14 tamyzda Sheteldik jumys kúshi saıasaty jónindegi komıtettiń 49-otyrysynda qabyldady. Qazaqstan azamattaryn alǵash ret jumysqa tartý barlyq qajetti rásim aıaqtalǵannan keıin 2028 jyldan bastalady dep josparlanyp otyr.
Eske salaıyq, buǵan deıin Qazaqstanda jumys isteıtinder sany 9,3 mln adamǵa jetkenin jazǵan edik.
