Qazaqstan azamattardyń tsıfrlyq qaýipsizdigine basymdyq beredi – Qasym-Jomart Toqaev
ASTANA. KAZINFORM – Qazaqstan memlekettik basqarý júıesi men ekonomıkanyń naqty sektoryna aqyldy platformalardy tabysty túrde engizip keledi. Bul týraly Memleket basshysy Qasym-Jomart Toqaev V Eýrazııalyq ekonomıkalyq forýmda aıtty.
Prezıdent ótken jylǵy halyqqa Joldaýynda taǵy da Qazaqstandy tsıfrlyq memleketke aınaldyrý mindetin qoıǵanyn eske saldy.
– Bul jumysqa júıeli sıpat berý úshin 2026 jyl elimizde Jasandy ıntellekt jáne tsıfrlyq damý jyly dep jarııalandy. Biz bolashaqtyń negizin qalyptastyra otyryp, azamattardyń tsıfrlyq ortadaǵy qaýipsizdigine basymdyq beremiz. Qazaqstannyń jańa Konstıtýtsııasynda alǵash ret jeke derekterdi qorǵaý quqyǵy bekitilip, málimetterdi zańsyz jınaýǵa, óńdeýge jáne paıdalanýǵa, sonyń ishinde tsıfrlyq quraldar arqyly júzege asyrýǵa naqty tyıym salyndy. Muny asa mańyzdy dep sanaımyz jáne bul shyn máninde konstıtýtsııalyq mindetke aınaldy, – dedi Qasym-Jomart Toqaev.
Memleket basshysynyń aıtýynsha, ınstıtýtsıonaldyq negizdi kúsheıtý men ınnovatsııalardy keshendi túrde engizý úshin Jasandy ıntellekt jáne tsıfrlyq damý mınıstrligi quryldy. Jasandy ıntellektini damytý jónindegi keńestiń qurylýy da paıdaly qadam bolǵan. Bul konsýltatıvtik organnyń quramyna jetekshi sheteldik jáne otandyq sarapshylar, bıznes ókilderi men memlekettik organdar kirdi.
– Sonymen birge, biz qajetti ınfraqurylymdy jedel qarqynmen damytyp jatyrmyz. Qazaqstanda óńirimizde alǵash ret osy saladaǵy álemdik kóshbasshy – NVIDIA kompanııasynyń ozyq tehnologııalary negizinde eki sýperkompıýter iske qosyldy. «Derekterdi óńdeý ortalyqtary alqabyn» qurý basym mindet bolyp jarııalandy. Bul aýqymdy joba jahandyq kapıtal men álemdik tehnologııalyq alpaýyttardy tartatyn ortalyqqa aınalýda, – dep atap ótti Prezıdent.
Budan bólek, adamı kapıtalǵa da qomaqty ınvestıtsııa salynyp keledi. Astanadaǵy ALEM AI halyqaralyq ortalyǵynda jańa býyndaǵy eki halyqaralyq mektep – TUMO jáne Tomorrow School, sondaı-aq Telegram jáne Presight sekildi álemge tanymal kompanııalardyń zerthanalary ashyldy.
– Eki apta buryn men Qazaqstannyń orta bilim berý júıesine jasandy ıntellektini engizý jónindegi sharalar týraly jarlyqqa qol qoıdym. Bizdiń maqsatymyz – derbes oqytýǵa, ınfraqurylymdy jáne bilim berý standarttaryn damytýǵa basymdyq berip, pedagogterdiń quzyretin kúsheıtý, – dedi Qasym-Jomart Toqaev.
Aıta keteıik, búgin elordada Memleket basshysy Qasym-Jomart Toqaevtyń qatysýymen V Eýrazııalyq ekonomıkalyq forýmnyń (EEF-2026) plenarlyq otyrysy ótip jatyr. Forým taqyryby «Jahandyq tsıfrlyq básekedegi EAEO: jasandy ıntellektige basymdyq berý» dep atalady.
Bul jıynǵa Reseı Prezıdenti Vladımır Pýtın, Qyrǵyzstan Prezıdenti Sadyr Japarov, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan, Kýba Respýblıkasynyń vıtse-prezıdenti Salvador Valdes Mesa, Vetnam Premer-mınıstriniń orynbasary Ho Kýok Zýng, Mońǵolııa Premer-mınıstriniń orynbasary Nıamtaıshıryn Nomtoıbaıar, Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev jáne taǵy da basqa laýazymdy resmı tulǵalar keldi.
