Qazaqstan azamatshasy Túrkııadaǵy qazirgi ahýal týraly aıtyp berdi

ASTANA. QazAqparat - Ystambulda júrgen Qazaqstan azamatshasy Baqytgúl Salı «QazAqparatqa» qaladaǵy qazirgi jaǵdaı týraly baıandap berdi.

«Men Ystambulǵa demalýǵa kelgen edim. Keshki ýaqytta qala aıqaı-shýǵa tolyp ketti, halyq kóshege óre túregeldi.  Qazirgi kezde qala biraz tynyshtaldy. Kósheler men kópirler jabylǵan edi, endi olar ashyldy, kólik qozǵalysy  birtindep jandanyp jatyr. Jergilikti arnalar túngi saǵat 5-ten bastap iske qosyldy. Internet jumys istep turdy», - deıdi ol.

Onyń aıtýynsha, qazirgi kezde áýejaı jumysy áli tolyq jandanǵan joq. «Konsýldyqqa habarlasqanymyzda, ol jaqtan «jaǵdaı endi ǵana tynyshtalyp keledi, múmkin bolsa 1-2 saǵat syrtqa shyqpaı tura turyńyzdar,  ózimiz habar beremiz» degen habar keldi», - dep sózin qorytty B. Salı. 

Aıta keteıik, Túrkııa bıligi juma kúni keshke elde áskerı tóńkeris jasaý áreketi bolǵandyǵyn habarlaǵan bolatyn.  El prezıdenti Erdoǵan buny shaǵyn búlikshil top uıymdastyryp otyrǵanyn aıtyp, halyqty búlikshilerge qarsylyq kórsetýge shaqyrdy. Sońǵy málimetter boıynsha oqıǵa saldarynan kem degende 60 adam qaza tapqan.  

Túrkııadaǵy QR Elshiliginiń málimetinshe, kýrortty qalalardaǵy jaǵdaı turaqty, áıtse de demalýshy qazaqstandyqtarǵa qonaqúıden shyqpaýǵa keńes berildi.

QR Syrtqy ister mınıstrligi habarlaǵandaı,  Túrkııadaǵy qazaqstandyqtar úshin jedel jeli telefondary jumys jasaýda. 

Qosymsha suraqtar týyndaǵan jaǵdaılarda Qazaqstannyń Túrkııadaǵy dıplomatııalyq jáne konsýldyq mekemelerinde ashylǵan «jedel telefon jelisine» habarlasýǵa bolady:

- QR Elshiligi (Ankara q.): [phone],
- QR Bas konsýldyǵy (Ystanbul q.): [phone],
- QR Konsýldyǵy (Antalıa q.): [phone].