Qazaqstan azamatshasy Týnıstegi qyrǵynnan qalaı aman qalǵanyn aıtty
ASTANA. QazAqparat - Qazaqstan Respýblıkasynyń azamatshasy Elena Koemets Týnıstegi tragedııadan qalaı aman qalǵanyn áleýmettik jelidegi jeke paraqshasynda aıtyp berdi.
«Meniń, báleden qaǵatyn perishtem bar. Ol meni birneshe ret qaýipten saqtap qaldy. Mysaly, birneshe jyl buryn Kosta Kankordıo laıneriniń sýǵa batyp ketkeninde, sol kemege otyrmaı aman qaldym. Jaqynda, Tbılısıge barmaq bolyp edim, jolym túspedi. Onda sumdyq sý tasqyny boldy. Endi mine, Týnıs! Biz sol qyrǵyn bolǵan otelge barmaq edik. Men, estigende eseńgirep qaldym. Ulymnyń shet elge shyǵatyn pasportyn joǵaltyp alyp, qalyp qoıǵan edik bul sapardan», dep jazady ol Feısbýktegi jeke paraqshasynda. Eske sala keteıik, 26 maýsym kúni Týnıstegi tanymal Sýs shıpajaıyna qarýly shabýyl jasaldy. BAQ-ta «Imperıal» qonaqúıiniń týrısteri zardap shekkeni habarlandy. 39 adam lańkestik qurbany boldy. Týnıstegi atysty «Islam memleketi» terrorlyq uıymy jasaǵanyn málimdedi.
