Qazaqstan azamatyn ózbek keden qyzmetkeriniń urǵany ras pa — SІM jaýaby

ASTANA. KAZINFORM — Elimizdiń Syrtqy ister mınıstrligi Qazaqstan men Ózbekstan shekarasyndaǵy «Navoı» ótkizý pýnktinde bolǵan jaǵdaıǵa qatysty túsinik berdi.

Eske salsaq, oqıǵa 5 shilde kúni eki el shekarasyndaǵy baqylaý-ótkizý beketteriniń birinde bolǵan. Áleýmettik jelide taraǵan vıdeoda qazaqstandyq azamat pen ózbekstandyq keden qyzmetkeri arasynda janjal týyndap, arty tóbeleske ulasqanyn baıqaýǵa bolady. Sondaı-aq vıdeoda kedenshi Qazaqstan azamatyn uryp jibergen.

Beınejazba jeli qoldanýshylary arasynda qyzý talqyǵa tústi. Kóptegen pikir qaldyrýshy atalǵan jaǵdaıǵa resmı túrde baǵa berýdi jáne kinálini jaýapqa tartýdy talap etti. Jeli qoldanýshylardyń pikirinshe, shekarada beıbit azamattarǵa kúsh qoldanýǵa jol berilmeý kerek. 

— Bar aqparatqa sáıkes, atalǵan oqıǵaǵa baılanysty Qazaqstan men Ózbekstan shekara ókilderi kezdesý ótkizdi. Kezdesý barysynda ózbek tarapy bul máseleni ádil ári obektıvti qarastyratynyn habarlap sendirdi, — degen jaýap aldyq Syrtqy ister mınıstrliginen agenttik joldaǵan saýalǵa. 

Osy oraıda SІM máseleniń ereksheligin eskere otyryp, mán-jaıdy anyqtaý úshin Ulttyq qaýipsizdik komıtetiniń shekara qyzmetine júginýdi usynyp otyr. 

Taıaýda Kazinform tilshisi «Kaplanbek — Navoı» ótkizý beketin jaıaý júrip ótip, mundaǵy jaǵdaıdy kózimen kórip qaıtqan edi. 

Sondaı-aq Qazaqstan men Ózbekstan arasyndaǵy jabyq turǵan iri shekara beketi qashan ashylatyny týraly jazǵan edik.