Qazaqstan azamaty Vetnamda iz-túzsiz joǵalyp ketti

ASTANA. KAZINFORM — 26 jasar Qazaqstan azamaty Ásem Áýbákir Vetnamda iz-túzsiz joǵalyp ketti. Ol jaqyndarymen sońǵy ret 6 naýryz kúni saǵat 14:42 shamasynda Hoshımın qalasynda baılanysqa shyqqan. Sodan beri týystary onymen habarlasa almaı otyr.

Qyzdyń joǵalǵany týraly áleýmettik jelide onyń ápkesi Rýzanna Jýsýpova málimdedi.

Týystarynyń aıtýynsha, Asem Hanoı qalasyna barýdy josparlaǵan. Barlyq tólemdi kartamen jasaǵan, al qolynda qolma-qol qarajaty bolmaǵan.

Jaqyndarynyń aıtýynsha, joǵalyp keter aldynda boıjetken ózin bireýler ańdyǵanyn kúdiktenip, alańdaýshylyq bildirgen. Osydan keıin onymen baılanys úzilip qalǵan.

Týystary Vetnam aýmaǵynda júrgen qazaqstandyqtardan jáne sol elde turatyn azamattardan izdestirýge kómektesýdi suraıdy. Olar múmkindiginshe jergilikti aýrýhanalardy qarap shyǵýǵa, polıtsııa organdaryna habarlasyp, qyzdyń júrgen jeri týraly qandaı da bir aqparat bolsa jetkizýge shaqyrady. Sondaı-aq jaqyndary Ońtústik-Shyǵys Azııadaǵy ınternet-qoǵamdastyqtar men eriktilerdiń de qoldaýyna úmit artyp otyr.

Atalǵan jaǵdaıǵa qatysty QR Syrtqy ister mınıstrligi túsinikteme berdi.

Vedomstvonyń málimetinshe, qazaqstandyq dıplomattar izdestirý jumystaryn júrgizip jatyr.

— Qazaqstannyń Vetnamdaǵy elshiligi Ásem Áýbákirdiń týystarymen baılanysta jáne Vetnamnyń quzyrly organdarymen birlesip jumys júrgizip jatyr. Qazirgi ýaqytta onyń naqty júrgen jerin anyqtaý sharalary qolǵa alynǵan. Bul másele QR SІM-niń baqylaýynda, — dep habarlady mınıstrlik.

Іzdestirý jumystary jalǵasyp jatyr. Týystary aqparattyń keńinen taralýy qyzdyń júrgen jerin anyqtaýǵa kómektesedi dep úmittenedi. Eger Ásem Áýbákir týraly qandaı da bir málimet belgili bolsa, jaqyndary bul týraly quqyq qorǵaý organdaryna nemese Qazaqstannyń dıplomatııalyq ókildikterine habarlaýdy suraıdy.

Buǵan deıin Fılıppın aýmaǵynda parom apatynan júzdegen jolaýshy iz-túzsiz joǵalyp ketkeni habarlanǵan edi.