Qazaqstan azamaty «Seýldiń qurmetti turǵyny» ataǵyna ıe boldy

ASTANA. KAZINFORM - Seýl qalasy ákimdiginde «Seýldiń qurmetti turǵyny» ataǵyn tabystaý saltanatty rásimi ótti. Bıyl bul joǵary marapatqa Qazaqstan azamaty, Qazaqstan Respýblıkasynyń Koreıa Respýblıkasyndaǵy Elshiliginiń qyzmetkeri Rýslan Qaırambaev ıe boldy.

Bul ataqqa 1958 jyly taǵaıyndalǵannan beri álemniń 100 elinen barlyǵy 933 adam ıe bolǵan. Ataq Seýldiń damýyna aıtarlyqtaı úles qosqan shetel azamattaryna beriledi. Bıyl bul ataq halyqaralyq yntymaqtastyqty nyǵaıtýǵa jáne qalanyń órkendeýine úles qosqan 16 laýreatqa tabystaldy.

Seýl ákiminiń birinshi orynbasary Kım Sang Han marapat ıeleriniń eleýli jetistikterin atap ótip, olardyń jemisti eńbegi úshin alǵysyn bildirip, halyqtar men mádenıetterdiń jaqyndasýynyń mańyzdylyǵyn erekshe atap ótti.

Rýslan Qaırambaev ótken jyldyń jeltoqsan aıynda jasaǵan erligi úshin joǵary baǵaǵa ıe boldy. Ol jer asty avtoturaǵynan shyǵyp kele jatqan janyp jatqan avtokólikti órt sóndirýshiler kelgenge deıin sóndirip, jalynnyń taralýynyń aldyn alyp, adamdardyń ómirin saqtap qaldy.

Barlyq laýreattar atynan sóz sóılegen qazaq dıplomaty Seýl qalasynyń ákimdigine kórsetken qurmeti úshin alǵys aıtyp, óz áreketin erlik dep sanamaıtynyn jetkizdi: «Meniń ornymda bolǵan kez kelgen adam dál solaı jasar edi». Sondaı-aq, ol bul marapat Qazaqstan men Koreıa arasyndaǵy dostyq pen ózara túsinistikti nyǵaıtýǵa yqpal etedi degen senimin bildirdi.

Bul marapat Qazaqstan men Ońtústik Koreıa arasyndaǵy ekijaqty baılanysty nyǵaıtý men halyqaralyq qarym-qatynastardy damytýdaǵy yntymaqtastyqtyń mańyzdylyǵyn aıqyndaıdy.