Qazaqstan aımaqtyq kóliktik-logıstıkalyq hab qurý úshin reforma júrgizýde
ASTANA. QazAqparat - Jańa ekonomıkalyq modeldi júzege asyrý úshin Qazaqstannyń aımaqtyq kóliktik-logıstıkalyq habqa aınalýyna baǵyttalǵan kólik salasyn reformalaý qolǵa alyndy, dep habarlaıdy QR IDM baspasóz qyzmeti.
«Kólik salasyndaǵy zańnamaǵa, atap aıtqanda 12 zańǵa 86 ózgeris engizildi. Ózgerister mýltımodaldy dálizdiń tıimdi jumys isteýine, «Áýe jibek jolyn» damytýǵa jáne avtokólik joldary qurylysyna ınvestıtsııa tartýǵa, memlekettik-jekemenshik áriptestik qaǵıdasy negizinde jol-kóliktik ınfraqurylymdy damytýǵa baǵyttalǵan. Bul týraly QR Investıtsııalar jáne damý mınıstri Áset Isekeshev búgin alqa májilisinde aıtty», delingen habarlamada.
«2015 jyly Astanadan barlyq baǵyttar boıynsha taraıtyn «Nurly jol» baǵdarlamasynyń ınfraqurylymdyq jobalaryn jan-jaqty júzege asyrý bastaldy. Daǵdarysqa qarsy sıpattaǵy atalǵan jobalar aıasynda qosymsha jumys oryndary ashylady» - dedi Á.Isekeshev.
Mınıstrdiń aıtýynsha 2015 jyly jalpy qoldanystaǵy 3,3 myń km avtojol jol-qurylys jumystarynyń barlyq túrimen qamtyldy. Barlyq nysandarǵa 100 myńnan astam adam jumyldyryldy. Jyl qorytyndysy boıynsha jalpy qoldanystaǵy 3,5 km avtojol jóndeldi, onyń ishinde 1,7 km respýblıkalyq mańyzdaǵy jol.
Sonymen birge sapaly jolaýshylar tasymalyn qamtamasyz etý men ınfraqurylymdy damytýdy eskere otyryp, onyń kólemin arttyrý úshin bıyl temirjol salasyna jeke ınvestıtsııa tartýǵa jaǵdaı jasaıtyn erejeler zańnama arqyly bektiledi. Bul jyl saıyn 25 mlrd. teńgeden astam qarjy tartýǵa múmkindik beredi.
Mınıstr elimizdiń aımaqtyq kóliktik-logıstıkalyq habqa aınalýy úshin Qazaqstannyń batysy men shyǵysynda ınfraqurylymdyq jobalardyń qurylysy boıynsha jumystar júrgizilip jatqanyn aıtty. Atap aıtqanda Aqtaý portyn keńeıtý aıaqtalady, «Qorǵas-Shyǵys qaqpa» AEA aýmaǵynda «Qurǵaq port» iske qosyldy. Quryq portynda paromdyq keshen qurylysy jalǵasýda. Keleshekte Quryq paromdyq keshenin temirjol magıstralimen jalǵaıtyn jańa Borjaqty-Ersaı jelisi boıynsha negizgi jumystar aıaqtaldy.
