Qazaqstan aımaqtarynda altyn quny qansha turady
ASTANA. KAZINFORM - Qazaqstandyqtar arasynda, sonyń ishinde merekede altyn buıymdarǵa suranys joǵary bolady. Kazinform agenttiginiń tilshisi bir gramm altyn quny qazir qansha turatynyn anyqtap bildi.

Jyl ótken saıyn baǵaly metall quny qymbattap keledi. Ulttyq statıstıka bıýrosynyń derekterine súıensek, 2024 jyly altyn buıymdar baǵasy 8,3% ósti. Álem naryǵynda da baǵaly metall quny kóterilgen.
Qazirgi kezde Qazaqstan aımaqtarynda baǵa gramyna 20 000 men 80 000 teńge aralyǵynda. Biz bul joly 585 jáne 583 synamasynyń qunyn bildik.
Elimiz boıynsha eń qymbaty Atyraýda bolyp shyqty. Munda 585 synamasyndaǵy altynnyń gramy 80 myń teńgege deıin jetedi. Al eń arzany Shymkent qalasynda bolyp shyqty. Altyn buıymnyń gramy munda 20 000 -25 000 teńge turady.
Qaraǵandy, Oral, Kókshetaý, Qyzylorda men Tarazda 585 synamasyndaǵy altyn gramynyń baǵasy 30 000 teńgeden bastalyp, 50 000 teńgege deıin jetedi.
Al Almaty, Jezqazǵan, Aqtaý, Aqtóbe, Pavlodar, Petropavl, Qostanaı, Óskemen, Taldyqorǵan, Qonaev jáne Túrkistanda baǵa sál joǵary. Munda bir gramm altyn 33 000 teńgeden bastalyp, 50 000 teńgege deıin jetedi.

Astana, Atyraý jáne Semeıde baǵa ózgelerge qaraǵanda joǵary. Baǵaly metall gramy bul qalalarda 40 000 teńgeden bastalyp, 80 000 teńgege deıin jetedi.
Sonymen birge saýda oryndarynan áli de 583 synamasyndaǵy altyn buıymdardy kezdestirýge bolady. Bul áshekeılerdegi altyn gramynyń baǵasy 17 000 myńnan bastalyp, 44 000 teńgege deıin jetedi.
Synamasy 583 bolatyn altynnyń gramy Shymkentte 17 000 teńge turady. Al Tarazda 43 000 teńge dep kórsetilgen. Qazaqstannyń ózge qalalarynda baǵa 20 000 - 35 000 teńge teńge aralyǵynda.
Aıta keteıik 2024 jyly altyn quımalar kóp satylǵan óńirler: Almaty (32 735 dana, 69%), Shymkent (5 200 dana, 11%) jáne Qaraǵandy (2 209 dana, 5%).