Qazaqstan áıelderiniń 50%-ten astamy memlekettik organdarda jumys isteıdi
Aıta keteıik, Astanada «Aýǵanstandaǵy áıelderdiń quqyqtary men múmkindikterin keńeıtý» óńirlik konferentsııasy ótip jatyr. Ortalyq Azııa óńirinde alǵash ret uıymdastyrylǵan bul sharaǵa Aýǵanstan, Armenııa, Ázerbaıjan, Qyrǵyzstan, Tájikstan, Túrikmenstan, Ózbekstan, Eýropalyq Odaq, Qytaı, Reseı, Úndistan, AQSh memleketterinen jáne BUU-dan joǵary deńgeıdegi delegatsııa ókilderi keldi.
«Aımaqtyq yntymaqtastyq aıasynda, birinshiden, halyqaralyq bıznesti tartý arqyly áıelder kásipkerligin damytýdyń keshendi baǵdarlamasyn talqylaýdy jáne qabyldaýdy usynamyn. Sonymen birge, konferentsııaǵa joǵary deńgeıdegi delegatsııalardyń kelgenin eskere otyryp, Ortalyq Azııa men Aýǵanstandaǵy belsendi áıelder tobyn qurý usynylady», - dedi Gúlshara Ábdiqalyqova konferentsııada.
Memlekettik hatshy genderlik teńdik máseleleri men áıelderdiń quqyqtary men múmkindikterin keńeıtýdiń turaqty damýdyń mańyzdy aspektileri ekenin atap ótti.
Qazaqstanda da bul taqyryp memlekettik saıasattyń basty baǵyty bolyp tabylady. Máselen, qazirgi ýaqytta Qazaqstan áıelderiniń 50%-ten astamy memlekettik organdarda jumys isteıdi. Al Parlament Májilisindegi áıelder úlesi 27% quraıdy. Olardyń saıası partııalardaǵy ókildigi 33%-ten 57%-ke deıin jetedi. Respýblıkada kóshbasshylar mektebiniń jelisi jáne áıel saıasatkerler klýby bar.
Odan bólek, Qazaqstanda shaǵyn jáne orta bıznestiń 44% -tin áıelder basqarady, olar atalǵan sektordaǵy barlyq jumys oryndarynyń 1/3 bóligin quraıdy.
