Qazaqstan áıelderdiń qaýipsizdigi boıynsha TMD elderinen ozyq shyqty

ASTANA. KAZINFORM — Qazaqstan TMD elderi arasynda «Áıelder, beıbitshilik jáne qaýipsizdik» ındeksi boıynsha kóshbasshylar qataryna endi. Bul týraly Qazaqstandyq qoǵamdyq damý ınstıtýty habarlady. 

Osy aıda Djordjtaýn ýnıversıtetiniń Women, Peace and Security platformasynda jarııalanǵan derekke sáıkes, Qazaqstan álemniń 181 eli ishinde 72-orynǵa turaqtaǵan. Al TMD keńistiginde Armenııa men Belarýsten keıingi úshinshi orynǵa ıe.

Women, Peace and Security (WPS) ındeksi — elderdegi áıelderdiń jaǵdaıyn, qaýipsizdigin jáne qoǵam ómirine qatysý deńgeıin keshendi túrde baǵalaıtyn halyqaralyq kórsetkish.

Indeks 3 negizgi ólshemnen turady:

— Inklıýzııa: bilim alý deńgeıi, eńbek naryǵyndaǵy úlesi, sheshim qabyldaý protsesine qatysýy jáne t. b.
— Ádilettik: zań aldyndaǵy teńdik, alalaý men kemsitýdiń bolmaýy jáne t. b.
— Qaýipsizdik: turmystaǵy zorlyq-zombylyq, qoǵamdaǵy qylmys deńgeıi jáne t. b.

Aıta ketelik Prezıdent neke ınstıtýtyn «er men áıeldiń erikti, resmı odaǵy» dep zańmen bekitýdi usynǵan edi.