Qazaqstan áıelder quramasynyń Irlandııadan jeńilý sebebi: bas bapker túsinikteme berdi
ASTANA. KAZINFORM — Astanada Qazaqstan áıelder quramasy álem chempıonaty irikteý kezeńi pleı-off satysynda Irlandııamen kezdesý ótkizdi. Qazaqstandyq fýtbolshylar qarsylastaryna iri eseppen ese jiberip, oıyn 0:8 esebimen aıaqtaldy. Komandanyń bas bapkeri Begaıym Qyrǵyzbaeva matchtyń nátıjesine qatysty pikir bildirdi.
— Biz búgingi oıynda qarsylasymyzdyń qysymyna tótep bere almaı, oıynnyń basynda jyldam gol jiberip aldyq. Odan keıin bir oıynshymyz qyzyl qaǵaz alyp, oıynnan qýyldy. Bul bizdiń josparymyzǵa áserin tıgizip, jaǵdaıdy odan ári qıyndatyp jiberdi, — dedi Begaıym Qyrǵyzbaeva.
Bas bapker Irlandııa komandasy Eýropadaǵy úzdik komandalardyń biri ekenin atap ótti.
— Búgin olar óz deńgeıin dáleldedi. Oıynshylary fızıkalyq turǵydan óte myqty. Biz mundaı oıyndardan tájirıbe alamyz. Kelesi oıyndarda jınaqy oınap, jaqsy qorytyndy shyǵarýǵa tyrysamyz, — dedi bas bapker.
Buǵan deıin fýtboldan Qazaqstan áıelder quramasy álem chempıonaty joldamasyna talasatyny týraly habarlaǵan bolatynbyz.
