Qazaqstan áıelder quramasy voleıboldan Ulttar kýbogyn jeńispen bastady

ASTANA. KAZINFORM — Vetnam astanasy Hanoıda voleıboldan áıelder quramalary arasynda qurlyqtyq AVC Ulttar kýbogy oıyndary bastaldy.

Qazaqstan quramasy Fılıppın, Iran, Indonezııa, Mońǵolııa, Jańa Zelandııa komandalarymen birge V tobyna tústi.

Rıshat Gılıazýtdınovtiń shákirtteri bastapqy kezdesýin Jańa Zelandııamen ótkizdi.

Bapkerdiń sheshimimen Qazaqstan sapynda negizinen jas oıynshylar alańǵa shyqty. Soǵan qaramastan, qazaqstandyq qyzdar qarsylasyn 3:0 (25:15, 25:23, 25:15) esebimen tize búktirdi. 
Jeksenbi kúni qazaqstandyqtar Mońǵolııamen oınaıdy.

Atalmysh jarys qorytyndysy boıynsha bıyl reıtıngilik upaılar beriledi. Sonymen birge jeńimpaz 2026 jylǵy Azııa chempıonatyna joldama alady. 

Ótken jyly AVK shaqyrý kýbogy dep atalǵan osy týrnırdiń fınalynda Vetnam Qazaqstan quramasynan basym túsken bolatyn. Bıyl da osy eki komanda favorıt bolyp esepteledi.

Qazirgi kezde Qazaqstan quramasy FIVB reıtıngisinde 112,89 upaımen 31-orynda tur. Al Vetnam 112,73 balmen ókshelep keledi. Sondyqtan Qazaqstan óziniń ornynda qala ma, álde bir saty tómen túse me, osy dodada sheshiledi.

Ulttar kýbogy 14 maýsymda máresine jetedi.

Eske sala keteıik, budan buryn «Jetisý» klýbynyń alǵash ret Azııa chempıondar lıgasynyń jeńimpazy atanǵanyn jazǵan bolatynbyz.