Qazaqstan áıelder quramasy short-trekten tórt qurlyq chempıonatynda úzdik úshtikke endi

Kanadanyń Laval qalasynda short-trekten ótken tórt qurlyq chempıonatynda Qazaqstan áıelder quramasy úzdik úshtikke ilikti, dep habarlaıdy Kazinform. 

Qazaqstandyq qyzdar 3 myń metrlik estafeta jarysynda 4:16.200 nátıjemen máre syzyǵyn úshinshi bolyp qıdy. El namysyn ıAna Han, Málıka Ermek, Alına Ájiǵalıeva, Mádına Janbosynova jáne Olga Tıhonova qorǵady.

Kanadalyqtar (4:14.513) jeńimpaz atansa, ońtústikkoreıalyqtar (4:14.567) kúmis júldege qol jetkizdi. Tórt qurlyq chempıonatyna Eýropa quramalary qatyspaıdy.

Short-trekten BQO quramasynyń aǵa bapkeri, Qazaqstannyń eńbek sińirgen jattyqtyrýshysy Maksım Lozovoıdyń naqtylaýynsha, aıtýly dodada Argentına, Aýstralııa, Kanada, Qytaı, Japonııa, Ońtústik Koreıa, Jańa Zelandııa, AQSh jáne Qazaqstan shorttrekshileri baq synady.

Qazaqstan tórttiginiń quramynda batysqazaqstandyq Alına Ájiǵalıeva da óner kórsetti. Alına Ájiǵalıeva 2005 jyly 8 qazanda Oral qalasynda dúnıege keldi. Short-trekten halyqaralyq dárejedegi sport sheberi. 2020-2023 jyldar aralyǵynda QR spartakıadasynyń jeńimpazy, el birinshiliginiń júldegeri atanyp úlgerdi. Sondaı-aq 2023 jyly qysqy ýnıversıadanyń qola júldegeri boldy.

«Alına endi Nıderlandta Leývarden qalasynda jastar arasynda ótetin álem kýbogi kezeńine qatysady», - dedi M.Lozovoı.

Eske sala keteıik, budan buryn short-trekten Qazaqstan quramasynyń álem kýbogi kezeńinde qola jeńip alǵanyn jazǵan bolatynbyz.