Qazaqstan áıelder quramasy semserlesýden Azııa chempıonatynda qola júlde ıelendi

ASTANA. KAZINFORM — Qazaqstan áıelder quramasy semserlesýden Djakartada (Indonezııa) ótip jatqan jasóspirimder arasyndaǵy Azııa chempıonatynda úshinshi oryn aldy. Bul týraly Ulttyq olımpıada komıteti málim etti.

Otandastarymyz qylyshtasýdan komandalyq saıysta qola júldege ıe boldy. Qurama sapynda Qaısha Jánibek, Adema Serikbaı, Nargız Saıdýllaeva jáne Adılıa Rsalına óner kórsetti. Olar Azııa chempıonatynyń jartylaı fınalyna deıin jetti.

Bul kezeńde qazaqstandyqtar Ózbekstan quramasyna 37:45 esebimen jol berip, jeńis tuǵyrynyń úshinshi satysyna kóterildi. Qytaı chempıon atandy. Ózbekstan ekinshi orynǵa ıe boldy. Japonııa quramasy da Qazaqstan sekildi týrnırdi úshinshi orynmen aıaqtady.

Semserlesýden Qazaqstan quramasynyń ókili Sofııa Aktaeva Djakartada (Indonezııa) ótip jatqan jasóspirimder arasyndaǵy Azııa chempıonatynda qola júldeger atanǵan edi.