Qazaqstan áıelder quramasy Islam yntymaqtastyǵy oıyndarynyń fınalyna shyqty
ASTANA. KAZINFORM – Gandboldan Qazaqstan áıelder quramasy Er-Rııadtaǵy (Saýd Arabııasy) Islam yntymaqtastyǵy oıyndarynyń fınalyna shyqty.
QR UOK málimetinshe, tartysqa toly jartylaı fınalda qazaqstandyq sportshylar Iran quramasynan basym tústi. Oıyn 28:25 esebimen Qazaqstan quramasynyń paıdasyna aıaqtaldy. Fınalda Qazaqstan Túrkııa quramasymen kezdesedi.
Gandboldan Qazaqstan áıelder quramasynyń qaqpashysy Damıra Japarova Er-Rııadta (Saýd Arabııasy) ótip jatqan Islam yntymaqtastyǵy oıyndarynyń fınalyna shyǵýyna qatysty pikir bildirdi.
Sportshynyń aıtýynsha, basty maqsat - altyn medal.
– Jeńiske jetkenimizge óte qýanyshtymyz. Tartysqa toly oıyn boldy. Fınalǵa shyqqanymyzǵa erekshe baqyttymyn. Biz úshin bul - alǵashqy Islam oıyndary. Alǵashqy jarysymyzda-aq fınalǵa deıin jettik. Endi Túrkııamen birinshi oryn úshin kúresemiz. Maqsatymyz - altyn medal alý. Túrkııanyń oıynyn aldyn ala zerttep shyqtyq. Biraq alańda bári ózgeredi. Alda álem chempıonaty da bar. Biz daıynbyz, - dedi ol.
Aıta keteıik, grek-rım kúresinen Qazaqstan quramasynyń balýany Islam Evloev Er-Rııadta (Saýd Arabııasy) ótip jatqan Islam yntymaqtastyǵy oıyndarynda kúmis medalǵa ıe boldy.