Regbıden Qazaqstan áıelder quramasy Azııa chempıonatynda kúmis medal enshiledi
ASTANA. KAZINFORM — Almatyda ótken regbı-15-ten Asia Rugby Emirates Women’s Championship týrnırinde Qazaqstan áıelder quramasy kúmis júldege ıe boldy. Bul týraly Týrızm jáne sport mınıstrligi málim etti.
Ekinshi oryn taǵdyry sheshilgen kezdesýde jerlesterimiz Gonkong quramasymen sheberlik baıqasty. Asa tartysty ótken matchta eki komanda da jeńis úshin bar kúshin saldy. Kezdesý 26:26 esebimen teń aıaqtalǵanymen, qosymsha kórsetkishter boıynsha Qazaqstan quramasy Azııa chempıonatynyń kúmis júldesin jeńip aldy.
Al altyn júldeni Japonııa quramasy merziminen buryn qamtamasyz etti. Kúnshyǵys eliniń ókilderi Qazaqstan komandasyn 64:12 esebimen, al Gonkong quramasyn 72:12 esebimen jeńgen bolatyn. Osylaısha, Qazaqstan áıelder quramasy óz jerimizde ótken Azııa chempıonatynda joǵary deńgeıdegi oıyn órnegin kórsetip, qurlyqtaǵy úzdik komandalardyń biri ekenin taǵy bir márte dáleldedi. Bul jetistik elimizdegi áıelder regbıiniń qarqyndy damyp kele jatqanyn ańǵartady.
Buǵan deıin Qazaqstan quramasy regbıden Omanda ótken týrnırde top jarǵan bolatyn.
