Qazaqstan aıatolla Hameneımen qoshtasý rásimine qatysty
ASTANA. KAZINFORM – QR Syrtqy ister mınıstri Ermek Kósherbaev Irannyń Joǵarǵy kóshbasshysy aıatolla Seıed Álı Hameneımen qoshtasýǵa arnalǵan aza tutý rásimine qatysty.
Sapar aıasynda Ermek Kósherbaevty Iran Prezıdenti Masýd Pezeshkıan qabyldap, sondaı-aq Irannyń Syrtqy ister mınıstri Abbas Arakchımen kelissózder ótti.
Qazaqstandyq mınıstr Memleket basshysy men Qazaqstan halqynyń atynan Iran basshylyǵy men halqyna kóńil aıtyp, zardap shekkenderdiń tezirek saýyǵyp ketýine tilektestik bildirdi.
Masýd Pezeshkıanmen kezdesýde taraptar onyń 2025 jylǵy 10–11 jeltoqsanda Qazaqstanǵa jasaǵan resmı sapary barysynda qol jetkizilgen ýaǵdalastyqtardy iske asyrý máselelerin, sondaı-aq óńirdegi ahýal men onyń damý perspektıvalaryn talqylady.
Abbas Arakchımen ótken kelissózderde ekijaqty yntymaqtastyq, halyqaralyq jáne óńirlik uıymdar aıasyndaǵy ózara is-qımyl, sondaı-aq Qazaqstan–Iran qatynastaryn damytý máseleleri qaraldy.
Ermek Kósherbaev Qazaqstannyń Iranmen dástúrli dostyq, tatý kórshilik jáne ózara tıimdi yntymaqtastyqty odan ári nyǵaıtýǵa beıildi ekenin rastady. Sonymen birge Iran men óńir elderiniń turaqtylyq pen qaýipsizdikti qamtamasyz etýdegi mańyzdy róline toqtaldy.
Kelissózder barysynda Iran men AQSh arasyndaǵy ózara túsinistik týraly memorandým aıasynda qol jetkizilgen ýaǵdalastyqtardyń mańyzy da ataldy.
Taraptar 2026 jylǵy 28 maýsymda Bender-Abbas qalasyndaǵy Shahıd Radjaı portynan qazaqstandyq kólik-logıstıkalyq termınal salýǵa jer ýchaskesin berý týraly kelisimge erekshe nazar aýdardy. Bul joba Memleket basshysynyń Qazaqstannyń kólik-tranzıttik áleýetin damytý jáne eksporttyq múmkindikterin keńeıtý jónindegi tapsyrmasy aıasynda júzege asyrylyp jatyr.
Kezdesýde atalǵan termınaldyń iske qosylýy Qazaqstan men Iran arasyndaǵy ózara saýda kólemin arttyrýǵa yqpal etetini aıtyldy. 2025 jyldyń qorytyndysy boıynsha eki el arasyndaǵy taýar aınalymy 26,4 paıyzǵa ósip, 430,2 mln AQSh dollaryna jetken.
Kelissózder qorytyndysynda taraptar Qazaqstan men Iran arasyndaǵy yntymaqtastyqty odan ári nyǵaıtýǵa jáne ekijaqty kún tártibiniń barlyq baǵyty boıynsha ózara is-qımyldy keńeıtýge ýaǵdalasty.
Aıta keteıik, buǵan deıin Tegeranda Irannyń Joǵarǵy kóshbasshysy Álı Hameneımen qoshtasý rásimi bastalǵany habarlandy.
