Qazaqstan avtotrassalarynda «Ortasha jyldamdyq» júıesi engizilýi múmkin

NUR-SULTAN. QazAqparat – Qazaqstanda «Ortasha jyldamdyq» júıesin engizý josparlanyp otyr. Bul týraly QR Іshki ister mınıstrligi Ákimshilik polıtsııa komıteti tóraǵasynyń orynbasary Jandos Muratalıev aıtty, dep habarlaıdy QazAqparat tilshisi.

«Biz keıde jergilikti atqarýshy organdarǵa trassalarda baǵdarsham obektilerin, jyldamdyq ólshegishterdi ornatýdy usynamyz. Bul sharalar, árıne, bir jyl buryn bıýdjette josparlanady, qaralady, saraptamadan ótedi, konkýrstar ótkiziledi. Bıyl kóptegen óńirlerde qosymsha «Sergek» kameralaryn ornatý qarastyrylǵan», – dedi J. Muratalıev.

Spıker avtotrassalardaǵy foto jáne beınetirkeý quraldary sany jyl saıyn artatynyn aıtty.

Sondaı-aq, J. Muratálıev Indýstrııa jáne ınfraqurylymdyq damý mınıstrligi «Ortasha jyldamdyq» júıesin engizýdi usynǵanyn aıtty. Ázirge bul usynys basqa memlekettik organdarmen talqylanyp jatyr.

«Ortasha jyldamdyq» júıesi belgili bir avtotrassanyń boıynda «Sergek» kameralaryn ornatýdy kózdeıdi. Mysaly, Nur-Sultan-Býrabaı tasjolynda eki jerge kamera ornatý jetkilikti bolady. Bul rette, avtokólik belgili bir ýchaskeden shekten asqan jyldamdyqpen ótse, júrgizýshige aıyppul týraly habarlama keledi», - dedi J. Muratálıev.

Buǵan deıin Jandos Muratálıev jol qozǵalysy qaýipsizdigi aılyǵy bastalǵanyn, ásirese túngi ýaqyttaǵy jol qozǵalysyn baqylaý kúsheıetinin aıtqan edi.