Qazaqstan avtonaryǵynda elektrli kólikterdiń úlesi qandaı
ALMATY. KAZINFORM — Bul suraqqa Kazinform tilshisimen tildesken Qazaqstan avtokólik odaǵynyń prezıdenti Anar Maqasheva jaýap berdi.
Onyń aıtýynsha, avtokólik naryǵynda elektromobılderdiń úlesi áli de kóp emes. Degenmen, toqpen júretin kólik túrine qyzyǵýshylyq jyldan jylǵa artyp keledi.
— 2019 jyly Qazaqstanda elektromobılderdiń ımporty jylyna myń kólikten asqan joq. Búgingi kúni elimizdiń avtokólik parkinde olardyń úlesi — 1 paıyzdan az, 16 myń kólik. Biraq qazir turǵyndar ekologııaǵa mán berip, aýany lastamaıtyn kólikti ala bastady. Onyń ishinde elektrli kólikter, gıbrıd, ıaǵnı aralas kólikter jáne Eýro-5 standartyna sáıkes keletin temir tulpar bar, — dedi ol.
Sonymen qatar Qazaqstan avtokólik odaǵynyń prezıdenti elektrli kólikterge arnalǵan ınfraqurylymnyń qazir qarqyndy damyp kele jatqanyn atap ótti.
— Elektrli kólikter úshin ınfraqurylym jaqsy damyp kele jatyr. Qazir kópshilik janarmaı beketterinde, oıyn-saýyq ortalyqtarynda kólikti qýattap alýǵa bolady. Tipti qaıda qýattaǵysh stantsııa ornalasqanyn kórsetetin kartalar da bar. Sondyqtan elektrli kólikterge qyzyǵýshylyq — elimizdi qosqanda barlyq álemde bar trend. Degenmen, Qazaqstan aýmaǵy úlken bolǵandyqtan, bizde elektrli kólikterge qaraǵanda gıbrıd mashınalarǵa suranys joǵary bolady dep oılaımyz, — dedi Anar Maqasheva.
Buǵan deıin Almatyda elektromobıl qýattaıtyn 311 stantsııa ornatylatynyn jazǵanbyz.
Zarıadtaý stantsııalary qala turǵyndary shoǵyrlanǵan oryndarda: bazar, saıabaq, dámhana jáne basqa da qoǵamdyq keńistikter aýmaǵynda ornatylady. Barlyq stantsııa osy jyldyń sońyna deıin paıdalanýǵa beriledi. Joba Almatydaǵy ekologııalyq jaǵdaıdy jaqsartý qajettiligine baılanysty, sondaı-aq megapolıstegi elektr kólikteriniń ósip kele jatqan sanyn eskere otyryp iske asyrylyp jatyr.
Eske salaıyq, Qazaqstan avtokólik odaǵynyń prezıdenti minilgen kólikter naryǵy týraly da pikir bildirdi.